Jóhannes Birgir Jensson

Verkefnið gengur bærilega, vefgrindin komin upp ásamt DAOgrindum, helstu EJB-baunum og servlettum. Lítur þokkalega út fyrir föstudaginn þegar Beta-skil fara fram. Þá eigum við að sýna að forritið virki í aðalatriðum, þeir hnökrar sem finnast þá eiga að vera mjög léttvægir og auðleysanlegir fyrir sjálfan skiladaginn á þriðjudeginum þar á eftir.

Stefán Pálsson varpaði fram hugmynd nú um daginn varðandi okkur stuðningsmenn enskra liða sem að styðjum ekki stóru liðin. Áhugaverð hugmynd, held að stórveldið (já!) Sheffield Wednesday sé það virkasta hér á landi af þessum “minni” liðum, a.m.k. eru öll úrslit uppfærð samdægurs á vef stuðningsmanna þess.

Ætli maður styðji ekki þetta framtak með ráð og dáð, annars munu engir litir sjást aðrir en rauður hér á götum úti (litir þriggja sigursælustu liðanna í Englandi).

Ökufáviti dagsins er ökumaður TJ 679 sem fór yfir 3 rauð ljós á Sæbrautinni og ók á líklega 140. Þetta er lítill gulur bíll og þó nær bílstjórinn rétt upp fyrir stýrið. Ætti að kippa svona geðsjúklingi af götunni hið snarasta.

Haukur bróðir er 26 ára í dag. Of hár aldur fyrir litla bróður! Það þýðir að ég sé enn eldri.

Áhugavert:

Knattspyrna gefur von

Á mig rann æði í gær þegar ég fór að versla í matinn og ég festi kaup á “Ben and Jerry’s Chocolate Fudge Brownie” ís. 800 krónur fyrir pínulítið box. Það varð reyndar drýgra en ég bjóst við þar sem þetta var einum of mikið súkkulaði í þessu fyrir mig, fékk mér bara tvær litlar skálar.

Fórum í kvöld á jólahlaðborð Hugvits. Það var haldið á Hótel Valhöll á Þingvöllum.

Þetta hlaðborð fær falleinkunn, það á reyndar við ramman reip að draga sem er hlaðborð í Perlunni í fyrra en tekst þó að fella sig sjálft. Þegar komið var á staðinn vantaði herðatré í litla fatahengið. Þjappað var á borðin þannig að við sátum eins og sardínur í dós og maður þurfti að beita áður óreyndum vöðvum í að skera matinn og pota honum í munn sér. Þrengslin þvílík og svo ætlaði hitinn að drepa mig. Sessunautar mínir spurðu mig meira að segja hvort ég væri að deyja úr hita þar sem það sást greiðlega á mér að svo var. Síldarþjöppun, ofboðslegur hiti og raki, þokkalegur matur, vondir eftirréttir og la-la rauðvín.

Þegar skemmtiatriðin hófust svo (ein söngkona og maður á hljómborði) var mér öllum lokið. Sem betur fer þurftum við ekki að bíða eftir rútunni sem fer ekki fyrr en um eittleytið í nótt, þau Arnar, Konni og Fjóla komu á einkabíl og skutluðu okkur heim og björguðu þar með verulegum hluta geðheilsu minnar (sem að er mjög viðkvæm fyrir miklum hita, sígarrettureyk og vondri tónlist).

Sjá einnig færslu Sigurrósar um þetta kvöld.

Fór í dag og festi kaup á Chief skrifstofustól frá Rúmfatalagernum. Aðeins um 8.000 krónur fyrir þennan fína stól. Hann er enginn Aeron en 14 sinnum ódýrari þannig að það sleppur.

Keyrði fram hjá Bílanausti áðan og sá þar mesta samansafn forstjórajeppa sem ég hef séð. Einhver gleðskapur væntanlega í gangi.

Lénið StarWars.is er nú komið á vefþjóninn minn. Ýmsar hugmyndir í gangi. Ekkert komið í gang. Reyndar ekki í fyrsta sinn sem að ég hef puttana í þessu léni, henti upp smá fréttasíðu þegar að lénið var fyrst skráð fyrir mörgum árum.

Tilvitnun dagsins:
“matters not that Padilla is a United States citizen captured on United States soil” (src)

Þarna er sumsé bandarískur ríkisborgari handtekinn í Bandaríkjunum fyrir hálfu ári síðan. Bush undirritar tilskipun þannig að hann er gerður að óvini ríkisins og settur í umsjón hersins þar sem hann hefur verið síðan án dóms. Þau eru lítil þessi mærðu réttindi ef að þetta er hægt, ein skipun frá forsetanum og dómstólar gerðir óþarfir. Flækjast örugglega bara fyrir.

Það er ekki að ManU mönnum að spyrja, nú vill rekstrarstjóri þeirra fækka atvinnuliðum í Englandi niður í 40. Hinir mega éta það sem úti frýs, þetta er gömul saga frá ManU en sjaldan verið orðað jafn nákvæmt og núna. Vissulega eru mörg félög í fjárhagskröggum en það er vegna vitleysunnar sem fór í gang, að borga mönnum tugmilljón króna laun á viku! Enginn rekstur stendur undir því, hvort sem það er knattspyrnulið, pizzastaður eða fjárfestingabanki. Áður en geðveikin fór í gang lifðu hins vegar öll deildarliðin 92 ágætis lífi.

Annan daginn í röð kemur sjálfsmorð við sögu, núna er það ung listakona sem að drepur sig á listsýningu en það tekur sinn tíma fyrir alla að átta sig á því að líkið sé alvöru og ekki hluti af gjörningi.

Þessir glæpamenn eru magnaðir, 15 manna hópur í Brasilíu réð ekki við fenginn sem voru tveir hraðbankar. Þeir redduðu sér því vinnuafli með því að ræna strætisvagni og neyða farþegana til að hjálpa sem og gesti á nálægum bar.

Áhugaverðar fréttir fyrir píanóleikara og kaldranalegar fyrir píanóstillingamenn. Það er búið að búa til píanó sem stillir sig sjálft!

Gærnóttin var svefnlaus hjá mér, sat til hálf-átta í morgun við að berja saman hönnunarskýrslu sem átti að skila í dag. Námsþreyta orðin talsverð nú á þriðju önn ársins hjá mér og notkun á .jsp-síðum að ergja mig þar sem að þær eru í mínum huga mun verri kostur en bæði .php og .asp. Það er hins vegar ekkert val um það í þessu verkefni. Nóttin leið í félagsskap Bolta, Beyglu og annara sem ekki ganga undir álíka nöfnum.

Lagði mig þegar ég kom heim og fór svo í vinnu upp úr hádegi. Kvöldið farið í smá afslappelsi en bjó þó til smá fítus sem að verkefnið okkar mun styðjast við, gengi hlutabréfa á íslenska markaðnum. Þar sem að Icex myndi rukka okkur um 100 þúsund krónur fyrir að hafa alvöru rauntímagögn (sem þarf að auki að seinka um 30 mínútur) þá bjó ég bara til okkar eigin hlutabréfaveröld. Þetta er ekki alvöru gengi bréfa í þessum hlutafélögum! Vissara að slá varnagla svo að maður verði ekki lögsóttur fyrir rangar upplýsingar.

Þörf grein í Mogganum um dreifingu mynda á netinu. Þetta hefur mér alltaf verið þyrnir í auga og þó að ég opni póstinn og skoði innihaldið þá áframsendi ég það aldrei ef mér sýnist að efnið sé niðurlægjandi fyrir viðkomandi. Suma er þó hægt að nefna sem að vita fátt skemmtilegra en að velta sér upp úr útliti og hegðun annara.

Netsambandið hérna heima hefur verið afskaplega ótraust í dag, ADSL-tengingin dottið niður af og til í lengri tíma. Í 8007000 fæ ég bara símsvara og svo þegar gefa á mér samband við almennan þjónustufulltrúa fæ ég bara gamla “du-du-du”, línurnar hjá þeim kannski rauðglóandi?

Sigurrós bendi ég á einn mann sem að ergir sig á hringingum kirkjuklukkna. Ég ákvað að líta á björtu hliðina, maður sefur þá að minnsta kosti ekki það mikið frameftir á sunnudögum (kirkja í 30 metra fjarlægð frá okkur).

---

Þetta er magnaðasta sjálfsmorð sem ég hef lesið um held ég. Gerði sitt besta til að koma fólki ekki í uppnám og það virðist hafa virkað að hluta til.

Þegar veðurguðirnir eru manni ekki hliðhollir er sjálfsagt að friðþægja þá og hvað er betra til þess en naktir kvenmannslíkamar?

Þessi maður er búinn að búa til eigin Bachelor, konur sækja nú um í hrönnum að gerast eiginkona hans. Peningar eru alltaf lokkandi.

Ég held að þetta sé með verri jólagjöfum sem hægt er að gefa. Efast um að frúin hafi sama smekk og eiginmaður hennar.

Sit nú við skýrslugerð, hönnunarskýrslan á að skilast á morgun og það verður unnið fram á kvöld sýnist mér.

Queen-áhugamönnum gæti þótt áhugavert að skoða þessa frétt þar sem myndbandið við “Bicycle Race/Fat Bottomed Girls” er endurskapað til að auglýsa tölvuleik.

Það er að verða sífellt varasamara að leyfa börnum að leika með jafn einfalda hluti og lykla nú þegar tölvukubbar eru komnir í þá. Börnin éta að sjálfsögðu tölvukubbana og það getur verið kveikjan að undarlegri atburðarás.

Michelangelo virðist hafa spilað sig fátækari en hann var. Nýútkomin bók um kappann greinir frá því að hann hafi verið forríkur þegar hann lést. Með ígildi hallar í lausafé við rúmstokkinn og arðbærar fasteignir um borg og bý.

---

Þetta er fyndin grein. Að það sé óverðskuldað að blettur falli á íslenska ríkið vegna meintra mannréttindabrota þess? HaHaHaHa! Sagði Ástþór “handtakið mig á grunni nýju laganna”? Sögðu tævanskir vísindamenn “meinið okkur inngöngu byggða á þjóðerni okkar” við sendiráðin sem neituðu þeim um vegabréfsáritanir á vísindaráðstefnu? Sögðu Falun Gong iðkendur “handtakið okkur því að við munum stara ásökunaraugum á menn sem valda ómældri þjáningu og kúgun”?

Það eru margir blettir sem hafa fallið á íslenska ríkið undanfarna mánuði, og þeir eru allir verðskuldaðir.

Potturinn sagði að Katrín Fjeldsted “fylgdi san[n]færingu sinni (hver gerir það ekki?)”. Hver gerir það ekki? Enginn annar en Vilhjálmur Egilsson sem lýsti því yfir að hann ætlaði að greiða atkvæði gegn eigin sannfæringu á þingi. Þar með fór hann á “ævarandi skömm” listann hjá mér, þegar að það er ekki hægt að treysta þingmönnum til að standa við eigin sannfæringu þá er orðið lítið gagn í að hafa þá á þingi. Svo eru auðvitað örugglega fleiri á þingi sem greiða atkvæði gegn eigin sannfæringu en básúna það ekki út, þeir eru verri ef eitthvað er.

Annasamur dagur í vinnu og tveim lokaverkefnum (jólaverkefnið og svo lokaverkefnið). Sést alls staðar í mýflugumynd.

Gömlu hjónin fyrir neðan okkur eru að flytja út, búin að fá íbúð við Hrafnistu. Hvorugt í nógu góðu ástandi fyrir stigana hérna. Áhugasömum er bent á að íbúðin fer á sölu einhver tímann í janúar, stór íbúð á besta stað. Þetta verður ekki undir 20 milljónum hugsa ég.

Nú er fjölmiðlarisinn Rupert Murdoch búinn að festa augun á mínu ástsæla félagi Lazio, hefur í hyggju að kaupa liðið en það var sett í sölu nýlega eftir mikil fjárhagsvandræði Cirio-samsteypunnar sem á félagið. Lazio gengur ágætlega þrátt fyrir að leikmenn hafi ekki fengið launin greidd síðustu 5 mánuði, er í efsta sæti deildarinnar sem stendur með snillinginn Roberto Mancini við stjórnvölinn.

Eftir að hafa skafið frostið af bílnum sat ég við vinnu í skólanum til kvöldmatar. Þegar ég kom heim hafði ég misst af gestakomum og Haukur var búinn að skrúfa hálft baðherbergið okkar sundur. Vaskurinn hefur verið treglekur hérna en í gær varð allt stopp, stíflaður til andskotans. Haukur kom og gekk í málið og fræddi okkur um það að rörin væru öll full af svörtum massa, kísill eða álíka efnum. Það lítur út fyrir að fá verði atvinnumenn í málið og jafnvel að skipta um rör. Það þyrfti þá líklega að splundra öllu á baðinu, kippa baðkarinu frá og flísunum þar með. Fjör.

Til að slappa aðeins af las ég svo License to Dream. Sammála einum lesanda sem sagði “For that matter, set down your copy of ”Men are from Mars, Women are from Venus” and pick up this instead. You’ll probably learn more about relationships, parenting, and just getting along from it than you will from any ten best-selling pop-psych books.”

Áhugavert:

Gömul frétt af öfgakönum

Mætti í skólann klukkan 10 og fór heim klukkan 18. Vinna við jólaverkefnið í fullum gangi, tíminn flýgur.

Þegar heim var komið eldaði Sigurrós fínasta mat úr Bónus-kjöti sem að virðist vera orðið vel boðlegt, sló út kjöt sem hefur verið keypt í Hagkaupum og 10-11.

Eftir matinn hélt ég áfram að vinna í verkefninu og horfði svo með öðru auganu á Lethal Weapon 4, þessi sería slær Bond léttilega út enda meiri húmor, raunverulegri hasaratriði, betri söguþráður og alvöru persónusköpun. Manni finnst nú að maður eigi að sjá nýjustu Bond-myndina, samt er ekki mikill æsingur í manni að sjá enn eina útblásna B-myndina. Held að ég hafi séð tvær af síðustu þremur Bond-myndum aðeins á myndbandi.

Fyrst ber að nefna að foreldrar mínir eiga afmæli í dag. Það er auðvitað algjör snilld að þau eigi sama afmælisdag, það fækkar fjölda daga sem þarf að muna. Engin stórafmæli en þó er stór áfangi í dag hjá föður mínum, flyst nú yfir á annan vinnustað fyrirtækisins eftir rúm tuttugu ár á sama stað.

Hæstiréttur, hin fræga verndarhendi barnaníðinga og annara ofbeldismanna, er nú líka orðinn refsivöndur bandarískra stórfyrirtækja sem reka ekki starfsemi hér á landi en gera samt tilkall til þess að eiga einkarétt á íslenska léninu ups.is, sjá frétt á Vísi og dóm Hæstaréttar.

Óvenju viðeigandi fyrirsögn á þessari frétt New York Times, 6 Israelis Die at Polling Station; Sharon Wins. Sharon er með hendur flekkaðar blóði þúsunda manna, fátt meira viðeigandi en að honum sé greiddur blóðskattur í formi eigin flokksfélaga (já.. þetta hljómar helvíti kaldranalega). Ísland er sníkjudýr í heimi alþjóðastjórnmála, það gæti hafið sig upp í hlutverk músar ef það öskraði að það setti viðskiptabann á Ísrael þar til allar landnemabyggðir hafa verið fjarlægðar af ísraelsku landi (mikilvægt skref í átt að framtíðarfriði).

Talandi um Ísland, nú hefur allur heimurinn fengið fréttirnar af krókódílamálunum hér heima í gegnum skeyti Reuters. Sjálfur efast ég um að krókódílar verði meiri skaðræðiskvikindi en blessaðar rollurnar sem heimta þó nokkur mannslíf í umferðinni.

Annars er ekki allt neikvætt þó að ýmislegt neikvætt sleppi hér af lyklaborðinu, undanfarna daga hef ég verið að hlýða á snilldartónlist frá Xploding PlastiX af disknum Amateur Girlfriends Go Proskirt Agents. Má greina áhrif frá kvikmyndatónlist og Amon Tobin. Snilldarverk.

Þeir eru reffilegir á myndum hins opinbera vefs Norður-Kóreustjórnar feðgarnir Kim. Hægt að skoða vefinn á ensku, spænsku, kínversku, esperanto og norsku!

Er ég kominn með skrifræpu? Nei… bara dreifa huganum aðeins frá vinnu og skóla þar sem allt er á fullu og meira en það.