Jóhannes Birgir Jensson

Það er ekki öll vitleysan eins, í Nígeríu óttast menn að hárklipping knattspyrnumanna leiði til þess að ógnarlegur fjöldi ungra manna verði samkynhneigðir.

Maður getur varla annað en tárast þegar maður les um hinstu kveðjur til Brian Clough, litríks framkvæmdastjóra og snillings sem er nýlátinn eftir mikinn vinskap við bokkuna.

Réttur í Bandaríkjunum hefur kveðið upp þann dóm að lög um aðgengi fatlaðra eigi ekki við vefi. Opinberar stofnanir eru skyldugar til að taka tillit til þess en einkaaðilar ekki, sem stendur. Þetta er alltaf mál sem þarf að skoða þegar vefir eru gerðir.

Nú um helgina kom Steve Bruce, núverandi framkvæmdastjóri knattspyrnuliðs Birmingham City, að þjófum sem voru að reyna að stela bifreið dóttur hans. Hann lenti í ryskingum við þá og var frekar skrautlegur á að líta þegar hann stýrði liði sínu.

Íslenskir íþróttafréttamenn hafa sjaldnast náð upp í þá gæðastaðla sem ég sjálfur hef ákveðið og séð marga erlendis ná upp í. Það kom mér því lítið á óvart þegar að Snorri Sturluson fór að fjalla um þetta atvik í tengslum við knattspyrnu, að þessi ljóti blettur sé alltaf á knattspyrnunni. Þarna var hann sumsé búinn að umbreyta þjófum í knattspyrnubullur, það er nú til slatti af þeim án þess að hann sé að bæta við með svona bulli.

Þetta er hrikalega pirrandi þegar að menn gera sitt besta til að sverta eitthvað með rangtúlkunum, hvort sem er í fótbolta eða öðrum málum.

Það fyrirfinnast gáfumenni víða, þar á meðal þessi reykingakona sem hefur áhyggjur af heilsu barnsins… vegna hávaða frá vegaframkvæmdum. Reykingarnar styrkja væntanlega ónæmiskerfið?

Annars er gott að sveitarfélögin séu aðeins að minna á hvernig ríkið reyndi að sleppa billega:

Strandar kennaradeilan á ríkinu?
Fleiri þurfa að koma að kennaradeilunni en sveitarfélögin og kennarar segir Lúðvík Geirsson, bæjarstj. í Hafnarfirði. Ríkið þarf að gera upp skuldir sínar við sveitarfélögin segir hann en engir fjármunir séu til skiptanna hjá sveitarfélögunum til að mæta útgjöldum vegna samninga við kennara.

Samningaviðræður um tekjuskiptingu ríkis og sveitarfélaga hafa staðið í 3 ár og miðar lítið segir Lúðvík. Hann segir að ríkið skuldi sveitarfélögunum miljarða kr. m.a. vegna tekjutaps sem sveitarfélögin hafi orðið fyrir vegna breytinga á skattkerfinu því þau hafi mun minni tekjur eftir að fólk fór í auknum mæli að stofna einkahlutafélög og húsaleigubóta sem þau þurfa á greiða
(www.textavarp.is)

Mér skilst að greinin þeirra Sigurrósar og Helgu hafi birst í Morgunblaðinu í dag. Stoltur af því hvað verkfallið hefur kveikt í konunni minni, enda hefur hún aldrei liðið óréttlæti.

Kláraði í gærkvöld að lesa A Song for Nero sem er nýjasta sögulega skáldsagan frá Thomas Holt. Hann skrifar einnig léttari bókmenntir sem Tom Holt, þær eru keimlíkar Discworld en ekki eins. Sögulegu skáldsögurnar hans eru í miklu uppáhaldi hjá mér. Neró greyið var vissulega bastarður og fauti en fær frekar ósanngjarna útreið, Rómarveldið var í flottum málum með hann við stjórn.

Ég hef einmitt spáð mikið í þennan punkt hér að neðan. Allt í einu er allt brjálað og alveg bráðnauðsynlegt víst að koma Jóni Steinari í hæstarétt, allir sjálfstæðismenn dregnir út og látnir hrópa hástöfum ágæti hans. Spurningin er sú… þegar hann dæmir í máli sem tveir lögmenn flytja og annar þeirra skrifaði undir áskorunina og hinn ekki… hvernig getur hann haldið fram því að það hafi engin áhrif á dóminn eða mat hans á sönnunargögnum og röksemdafærslum?

Skondið svo að nýi óreyndi dómarinn úr bláu handar klíkunni mæli sérstaklega með honum, hann sem skreið inn með minnsta reynslu umsækjanda.

Hæstiréttur: Undirskriftir tvíeggjaðar
Á annað hundrað lögmanna hafa skrifað undir áskorun til stuðnings Jóni Steinari Gunnlaugssyni hæstaréttarlögmanni og umsækjanda um embætti hæstaréttardómara.

Gunnar Jónsson, formaður Lögmannafélags Íslands, telur óheppilegt að hópur hæstaréttarlögmanna standi fyrir slíkri undirskriftarsöfnun. Verði Jón Steinar skipaður dómari við hæstarétt hljóti að vakna spurningar um hæfi hans.

Gunnar hefur bent á að Eiríkur Tómasson, prófessor og umsækjandi um embætti hæstaréttardómara, hafi einnig mikla reynslu af lögmennsku.

Spurningin hvernig eigi þá að velja hæstarréttadómara er vissulega mikilvæg. Tregða dómara við að meta mannslíf meira en pappírspeninga er engum til sóma og þarf að breytast sem fyrst.

Eight hundred years your people have been fighting wars, and every single one of ’em started because the Romans were afraid of somebody, some bunch of woolly-backed savages who were bound to come raping and pillaging throughout the empire unless they were smacked down first. Eight centuries of pre-emptive strikes, millions of people dead and mutilated, because you Romans reckon peace is a good idea

–Thomas Holt, A song for Nero

Las í gærkveldi Eight days of Luke, saga í styttri kantinum um ævintýri drengs sem óvart lendir í ævintýrum með goðunum.

Fínasta lesning, rétt tæpir tveir tímar hjá mér enda unglinga/barnabók.

Aðdáendur CSI og viðlíka efnis þar sem lík eru krufin ættu að kíkja á þessa grein.

Ég var annars ekki meðal þeirra sem borguðu stórfé fyrir DVD-útgáfu StarWars. Þetta var betra í minningunni þegar maður var krakki að sjá ævintýrin.

Eins og þessi grein bendir á hafa Mikka Mús lögin svokölluðu (sem lengdu þann tíma sem að hugverkaréttindi njóta höfundarréttar í 3 kynslóðir) gert það að verkum að listaverk sem enginn ábyrgðaraðili finnst fyrir er samt ekki hægt að gera aðgengileg almenningi.

Mál sem brennur svolítið á mönnum varðandi til dæmis vefi eins og timarit.is þar sem hægt er að fletta í eldri blöðum.

Það gengur nefnilega oft erfiðlega að finna einhverja sem báru ábyrgð á ýmsum útgáfum eða erfingja þeirra, sem þýðir að fjöldamörg fróðleg rit og annað morknar bara í geymslum en kemst ekki fyrir sjónir alþýðu. Varla nokkuð sem upphaflegir höfundar ætluðu sér.

Þetta á einnig við efni úr hirslum til dæmis Ríkisútvarpsins og -sjónvarpsins.

Það er svo sem margt annað að gerast í heiminum en kennaraverkfallið, verð þó að smella einum tengli á Erling þar sem hann spáir í hvernig kjaradómur fór með kennara. Fyrir 1984 sá kjaradómur um að ákvarða laun kennara og því komust þeir ekki í verkföll, er ekki alveg að átta mig á þeim sem segjast hafa lent í verkföllum fyrir 1984? Ég var nú í yngri kantinum þarna þannig að ég man voða lítið en hef ekki tiltækar heimildir um kennaraverkföll fyrir 1984?

Kíkjum til Ameríku, þar er allt að verða vitlaust vegna jesúlegrar myndar af Bill Clinton. Flott andsvarið neðst í fréttinni frá listamanninum, snart mitt guðlausa hjarta.

Sá glitta í Gunnar I. “Box” Birgisson í sjónvarpinu áðan. Þar talaði hann um hvernig “þjóðfélagið færi úr skorðum og verðbólga á flug” ef að kennarar fengju þær launahækkanir sem þeir krefjast.

Við skulum hafa eitt á hreinu. Gunnar Birgisson, minn fyrrum samstarfsmaður í Kópavogspólitíkinni (fyrir 8-12 árum) er með síðustu mönnum sem getur gagnrýnt kennara. Fyrir utan það að þiggja laun sem þingmaður, forseti bæjarstjórnar, reka eigið fyrirtæki og vera að auki í ótal nefndum (allt kemst þetta fyrir í 8 tímum á dag? ætti hann ekki að vera í hlutastarfi í þessu öllu til samræmis við vinnuframlag?) þá sat hann beggja megin borðs þegar ríkið flutti grunnskólakennara yfir til sveitarfélaga.

Hann veit því fullvel að ríkið reyndi að losna ódýrt úr þessu, flutti grunnskóla til sveitarfélaga en voða lítinn pening til að vega upp á móti þessu.

Þegar forystumenn sveitarfélaga barma sér yfir því að eiga ekki pening til að borga kennurum þá eiga þeir að gera kröfu á ríkið, ekki kennara, að taka það á sig.

Eiga kennarar að líða fyrir það að Alþingi og sveitarfélög klúðruðu þessum flutningi grunnskólanna? Er það þeim að kenna að sveitarfélög líta á þá sem ígildi barnapía, láglaunafólk sem á ekki að ybba sig heldur bara passa börnin á meðan að foreldrarnir eru að vinna í “alvöru vinnu” (sumsé ekki kennslu…) ?

Þetta klúður, þar sem Gunnar Birgisson samdi meðal annars við sjálfan sig, er komið frá Alþingi og sveitarfélögum. 75% landsmanna telja að kennarar hafi það þegar nógu gott, 75% landsmanna vita greinilega ekki betur.

Launakönnun VR sýndi að lægstu meðallaunin voru hjá starfsmönnum á kassa, 156 þúsund meðalgrunnlaun. Þetta eru byrjunarlaun nýútskrifaðs kennara. Kassastarfsmenn njóta samúðar minnar, þetta er líklega taugatrekkjandi starf. En ábyrgðin sem felst í því að afgreiða viðskiptavini er langt í frá sú sama og að sjá til þess að 18 til 28 nemendur fái einstaklingsmiðaða kennslu. Kassastarfsfólk tekur ekki vinnuna með sér heim, fer yfir kassakvittanir og býr til nýjar. Það gera kennarar með heimavinnuna og fá ekki borgað fyrir. Kassastarfsfólk hefur ekki lokið háskólanámi til að stunda vinnu sína.

Launakönnun VR sýnir svo allan þann fjölda starfa þar sem ólært starfsfólk fær mun meira borgað en kennarar með 40 ára starfsreynslu, kassafólkið er bara lægst launað og samt með sama og nýútskrifaðir kennarar.

Skoðaðu það Gunnar Birgisson. Þú vilt líklega vel en þú veist ekki betur. Lesið svo nýjasta pistilinn hjá Sigurrós.