Jóhannes Birgir Jensson

Eftir aðeins fjögurra stunda svefn var ég mættur fyrir framan sjónvarpið til að sjá Brasilíumenn sigra arfaslaka Englendinga. Svo var farið í vinnuna en tekið hlé um hálftólf og horft á leik Þjóðverja og Bandaríkjamanna hér í Betrabóli ásamt Val og Erni.

Eftir vinnu var haldið á Kambsveginn í þriðju flutningana þaðan á einu ári. Fyrst fór Guðbjörg á Selfoss, því næst fórum við á Flókagötu og nú var það Ragna á Selfoss. Þetta gamla ættarsetur er því nú búið að missa sína upprunalegu ætt, Ragna og Oddur byggðu þar ofan á lítið hús foreldra hennar fyrir 22 árum eða svo.

Á leiðinni á Selfoss sá ég að ég held hana Katrínu hjóla yfir Langholtsveginn, eins stórt og hún tekur upp í sig á vefnum sínum þá er hún afskaplega hlédræg stúlka á mannamótum. Gott dæmi um notkun á alter-ego eins og það er víst kallað.

Brasilía 2-1 England
Ekki er hægt að segja að Englendingar hafi verið ógnandi í leiknum, eina mark þeirra kom eftir mistök hjá varnarmanni sem að Owen nýtti mjög vel. Fyrir utan það ógnuðu þeir varla markinu allan leikinn. Ronaldinho lagði upp mark fyrir Rivaldo í viðbótartíma í fyrri hálfleik, skoraði svo úr aukaspyrnu langt utan af velli í seinni hálfleik, og var svo rekinn útaf fyrir grófa tæklingu. Tæklingin verðskuldaði gult spjald, sólinn of hátt á lofti, en rautt spjald er mjög strangur dómur, spurning hvort að aganefnd muni breyta því. Eftir brottreksturinn bökkuðu Brasilíumenn en fóru þó að halda boltanum mun betur. Áhugalausir Englendingar horfðu á þá spila reitabolta og gerðu fátt af viti. Seaman meiddist í fyrri hálfleik og var greinilega ekki góður í bakinu, það sást í báðum mörkum Brasilíumanna, Eriksson hefði betur skipt honum útaf fyrir heilbrigðan markmann. Beckham meiddist líka og haltraði um völlinn, Scholes átti arfaslakan leik og missti boltann oft og mörgum sinnum. Sanngjarn sigur Brasilíumanna, en ekki get ég sagt að ég vilji sjá þá sem heimsmeistara. Óskarsframmistaða Rivaldos er orðinn mjög þreytandi, algjörlega óíþróttamannslegt bull sem að ég líð ekki. Þar að auki komust Brasilíumenn upp með að hlaupa burtu með boltann þegar dæmdar voru aukaspyrnur á þá, nokkuð sem að önnur lið hafa fengið gul spjöld fyrir.

Þýskaland 1-0 Bandaríkin
Bruce Arena er greinilega hæfur þjálfari. Veikleikar Þjóðverjanna komu berlega í ljós á fyrstu mínútunum, Bandaríkjamenn sóttu mikið upp kantana og komust þar í auð svæði og sköpuðu talsverða hættu, aðeins Kahn bjargaði þýska liðinu frá því að lenda 2 mörkum undir. Þjóðverjar fóru þó aðeins að hressast og ná völdum á miðjunni en kantarnir voru enn galopnir hjá þeim og fljótir sóknarmenn Bandaríkjanna ullu miklum usla. Að auki voru ungu mennirnir í þýsku vörninni frekar kaldir, reyndu að hlaupa með boltann framhjá sóknarmönnum Bandaríkjanna og brenndu sig oft á því. Ballack skoraði loks með skalla, ég var einmitt nýbúinn að taka hann úr draumaliðinu sökum slaks leiks hans hingað til, jæja. Þjóðverjar ógnuðu talsvert en Bandaríkjamenn sömuleiðis. Sigurinn alls ekki í höfn fyrr en flautað var til leiksloka. Þýska liðið mun betra en 1998, en brotalamirnar eru augljósar, andstæðingar þeirra í næsta leik munu hafa séð í þessum hvernig best er að sækja á þá.

Valur leit við í kvöld og loksins höfðum við allt við hendina sem að þurfti til að setja upp örbylgjuloftnetið. Vinir mínir í Reykjafelli auðvitað liðlegir, það er svona að vera mikils metinn fyrrverandi starfsmaður! Reyndar einhver draugur í sjónvarpinu, get reynt að fínstilla við tækifæri (of seint núna, miðnætti og svo get ég ekki hrópað á sjálfan mig hvort að myndin hafi orðið betri eða verri) en hef þó heyrt að draugagangur sé almennur, varð ekki mikið var við hann á breiðbandinu þó.

Fattaði það í dag að ein af þeim sem bættust við á Nagportal í gær er sumarstarfsmaður hjá okkur (og hefur verið áður). Óskímon nefnist hún þar.

Annars fátt að frétta í dag, vann frameftir til að geta tekið pásu á morgun til að horfa á hádegisleikinn, morgunleikurinn ætti að verða mikil skemmtun, verst að það er of snemmt til að mann langi í popp með. Hitti reyndar Guðm. Stefán í fyrsta sinn í 4 ár líklega, okkur er báðum jafnilla við Blatter að sjálfsögðu, hann er að komast upp með þvílíka glæpi núna.

Það er alltaf jafn áhugavert að lesa skoðanir fólks, lestur einnar greinar fékk mig til þess að skrifa mína eigin á Huga.

Skaust í Miðhús í kvöld, náði loks að tengja þau aftur við netið, einhver services sem að höfðu rænt hinu og þessu. Greip með mér enn fleiri bækur til að fara með heim. Enn eru eftir kassar í geymslunni sem ekki er auðvelt að komast að.

Fór á leik með mínum gömlu félögum hjá Iceland United, þeir voru að keppa við eitthvað strætólið, Væringjana minnir mig, á gervigrasinu í Laugardal. Sá Örn, Val, Paolo og Rúnar leggja sitt af mörkum í öruggum 7-4 sigri, svo var í Iceland United leikmaður sem að var að bætast við á Nagportal einmitt í dag, skoraði tvö mörk og kallast víst Jommi, var sumsé að komast að því núna eftir þessa heimsókn á Nagportal. Margir nýjir í liðinu, enda gengi þess mun betra en í fyrra. Ætla að kíkja á 1-2 æfingar og sjá hvort að löppinn þolir álagið.

Á laugardaginn á svo Iceland United að keppa við FC Puma í bikarnum. Í FC Puma eru einmitt bræður mömmu, þeir Ívar og Hermann, sem og fyrrum skólafélagar úr vesturbænum (Kópavogi), flestir árinu yngri en ég.

Áhugavert:

Fyrsti dagur í vinnu í dag eftir fótboltaleyfið mitt, kom í ljós að ég hafði klikkað illilega á þessu þar sem að síðustu leikir 16-liða úrslita voru í dag. Ég ætlaði upphaflega að mæta í vinnuna, skjótast svo í burtu og sjá fyrri leikinn endursýndan og þann seinni í beinni og koma svo aftur, en þar sem að ég var dreginn út úr bænum í vinnuerindi varð ekki af því. Eftir vinnu var það svo beint í skólann og þegar ég kom heim voru 25 mínútur búnar af endursýndum leik Suður-Kóreu og Ítalíu.

Ég vil fá ríkissaksóknara til að rannsaka það hvaða Gestapo hefur dúkkað upp hér á Íslandi. Ómerktir bílar elta mótmælendur, mótmælendur eru handteknir í klárlega ólöglegum aðgerðum lögregluyfirvalda, yfirmenn ljúga blákalt og svo fá menn nafnlausar hótanir sem koma líklega frá aðilum innan löggæslu Íslands (Friðarspillar hf.). Að lögreglan sé orðin einkahersveit Davíðs (sem að útskýrir herbúðalíkinguna hans) er ógnvænleg tilhugsun, ég endurtek fyrri orð um þriðja ríkið, svona byrjaði þetta þar, ef við erum ekki vakandi vöknum við ekki fyrr en við megum ekki anda nema að biðja leyfis svartklæddra manna. Heimurinn er í vondum málum eftir 11. september, og þar vega ofstækismenn með sprengjur mun minna en skrifstofublækur andskotans sem nú teikna upp nýjar miðaldir og ný ríki myrkraveldis bæði hér á landi sem og í hinum vestræna heimi.

Í skólanum fékk ég að vita að ég hefði verið samkvæmur sjálfum mér í miðannarprófunum, 6.5 í hvoru fyrir sig. Ekki góðar einkunnir en prófin komu mér talsvert á óvart í efnistökum þannig að ég verð að taka því.

Á meðan ég var í skólanum tók píanóið hennar Sigurrósar sig á loft, híft út um svalirnar á Kambsveginum og svo aftur inn um svalirnar hér í Betrabóli. Sigurrós situr nú við það og mér heyrist hún vera í ágætri þjálfun þrátt fyrir litla iðkun undanfarna mánuði.

Japan 0-1 Tyrkland
Missti af leiknum sökum vinnunnar, og gef mér ekki tíma til að sjá endursýninguna núna. Er ánægður með að Tyrkirnir eru komnir áfram, finnst skrítið hvað mörgum er eitthvað illa við þá, þeir voru betra liðið gegn Brasilíu en áttu svo reyndar tvo daufa leiki. Liðið er hins vegar þrusugott og spilar fínan bolta. Einstaka aðrir eru þó sammála mér um Tyrkina (og reyndar Spánverja líka). Fínt skallamark hjá Tyrkjum, heyrði að restin af leiknum hefði verið í daufari kantinum. Japanir virðast hafa haft 6 miðjumenn… kannski of þétt?

Suður-Kórea 2-1 Ítalía (gullmark)
Missti af fyrstu 25 mínútunum eins og áður segir, en það sem ég sá af fyrri hálfleik var að Suður-Kórea réði leiknum. Mín ágiskun því sú að Ítalirnir hafi skorað og svo hörfað, sama gamla taktíkin og þeir hafa beitt undanfarna áratugi. Vítið sem Suður-Kórea fékk var rétt, en spyrnan var jafn slök og öll hin vítin sem hafa verið varin hingað til. Hvað er að þessum mönnum, atvinnumönnum í íþróttinni, sem að geta ekki tekið vítaspyrnu skammlaust heldur rúlla boltanum eftir jörðinni að markinu. Það á að taka þetta með nákvæmninni, helst í hliðarnetin og það frekar ofarlega. Skallamarkið hjá Vieri auðvitað flott, maðurinn óstöðvandi í teignum, glæsilegur skalli þó að verið væri að klæða hann úr treyjunni í loftinu. Í lok hálfleiksins fékk Coco slæmt högg og það fossblæddi úr skurðinum við gagnaugað, kom inná nokkuð spaugilegur með grisju um hausinn og leit nú út eins og fótboltastrumpur, hvítur kollur, blár að ofan og í hvítum buxum. Stuðningur áhorfenda alveg magnaður, ef eitthvað meiri en í síðasta leik þeirra. Trappatoni notar sínar skiptingar til að bakka í vörn á meðan að Hiddink skiptir fleiri sóknarmönnum inná. Ítalirnir ætla greinilega að reyna að halda 1-0. Ítalirnir aðeins sprækari í seinni hálfleik en ég sá þá í þeim fyrri, en Suður-Kórea ræður þó ferðinni. Bæði lið með færi, en Suður-Kórea jafnar á 88. mínútu. Vieri svo með dauðafæri en orðinn þreyttur og tekst að klúðra rækilega. Síðustu mínútur leiksins eru nú eins og handboltaleikur, liðin skiptast á sóknum og bæði komast í þvílík dauðafæri. Þá er komið að framlengingu, þar eru Suður-Kóreumenn áfram sterkari. Totti fær sitt annað gula spjald og er rekinn útaf, rangur dómur þar sem að hann lét sig ekki detta (í þetta eina sinn). Sóknir Suður-Kóreu skila þeim að lokum gullmarki, enda hefði mér ekki litist á blikuna fyrir þá í vítakeppni. Fínn sigur hjá góðu liði Suður-Kóreu sem að fæstir virðast reyndar kunna að meta samkvæmt því sem ég heyri? Ítalir úr leik sem mér finnst gott mál enda dauðþreyttur á þessum sið þeirra að skora eitt mark og bakka svo.

Enn og aftur voru leikirnir leiknir í grenjandi rigningu. Það virðist vera sem svo að allir leikir héðan í frá verði í grenjandi rigningu enda rigningartíminn nú kominn fyrir alvöru. Þessi rigningartími ber einn og sér mikla ábyrgð á því að þetta hefur verið HM óvæntra úrslita, bæði var keppni flýtt vegna hans (sem að leiddi til minni undirbúnings stórveldanna en áður) og bleytan hefur haft sitt að segja í leikjum keppninnar. Það er þó fínt að fá nýtt blóð í knattspyrnuna, og á heimsvísu held ég að þetta HM muni efla hana. Þvílíkur grís hjá rottunni honum Blatter að fá upp í hendurnar HM þar sem að úrslitin fara svona skemmtilega fyrir heimsbyggðina. Ekki hefur hann gert mikið gott sjálfur, hið andstæða raunar.

Áhugavert:

Elsta knattspyrnulið heims hefur verið sett í umsýslu eða hvað það heitir, síðasta skref fyrir gjaldþrotaskipti. Sagnfræðileg verðmæti sem gætu glatast ef að ekki rætist úr (svona svipað og tjáningarfrelsi Íslendinga?).

Get ekki sagt að ég hafi haldið upp á þjóðhátíðardaginn í dag, enda fáar ástæður til þess á þessum síðustu og verstu. Notaði daginn í að fikta í tölvunni hans Kára, hún kemur reglulega í skoðun. Fórum svo í mat til Rögnu, en Guðbjörg kom með læri í matinn alla leið frá Selfossi. Horfðum á Survivor, síðasta skiptið sem við gerum það á Kambsveginum, þar sem nú er tæp vika í flutningana.

Valur leit svo við hérna heima og við fórum að reyna að setja upp örbylgjuloftnetið. Það vantar kall og það vantar kellingu, spýtu og sög, til að þetta fari nú að virka, framhald á morgun.

Bandaríkin 2-0 Mexíkó
Mér leist ekkert á þetta fyrir leikinn, mínir menn í Mexíkó hafa farið halloka undanfarið fyrir Könunum sem að hafa eitthvað tak á þeim. Mexíkóar ráða þó leiknum í upphafi en á 8. mínútu fá Bandaríkjamenn sína fyrstu sókn og gerast svo djarfir að skora úr henni, McBride eftir sprett frá Reyna og sendingu frá Wolff. Gamla kempan Luis Hernandez kemur inná á 28. mínútu til að setja meiri brodd í sóknarleikinn og færa Blanco aftar til að skapa færin. Línuvörðurinn drepur nokkrar sóknir Mexíkóa með vitlausum rangstöðudómum. Mexíkóar byrja seinni hálfleik af krafti með miklum sóknum, en Bandaríkjamenn byrja á því að safna gulum spjöldum. Miðjumaðurinn O’Brien slær hornspyrnu Mexíkóa frá marki sínu, þar sem hann var ekki markmaður er nokkuð ljóst að þarna átti að dæma víti en einhver óútskýranleg blinda háði bæði dómara og línuverði þarna, Bandaríkjamenn sleppa með ljótan hrekk. Á 65. mínútu koma Bandaríkjamenn í eina af fáum skyndisóknum og nú skora þeir, ungstirnið Landon Donovan skallar boltann í markið eftir fyrirgjöf Eddie Lewis. Tvö mörk Bandaríkjamanna komið bæði gegn gangi leiksins, Mexíkóarnir verið mun slappari en þeir hafa verið alla þessa keppni, spurning hvort þetta hafi verið sálrænt atriði, að Bandaríkin séu þeirra “Svíagrýla”. Mikil barátta, þéttur varnarpakki, vel kláruð færi og hálfblindir línuverðir skila Bandaríkjunum í 8-liða úrslit.

Belgía 0-2 Brasilía
Belgar byrja leikinn vel og ógna marki Brasilíu mun meira. Belgarnir ráða leiknum, Brasilíumenn eru allt í einu orðnir litla liðið sem notar skyndisóknir, taktík sem að reyndar virðist vera að ganga upp í þessum 16-liða úrslitum. Belgar skora fínt mark en dómari með talsverð tengsl við FIFA-mafíuna (mikill vinur Jack Warner forseta CONCACAF, sem er aftur mikill vinur Sepp Blatters, rottu í mannsmynd og forseta FIFA) dæmir markið af sökum engrar sjáanlegrar ástæðu. Belgar halda áfram með pressuna í seinni hálfleik, en á 67. mínútu fær Rivaldo boltann fyrir utan teig Belga, snýr sér laglega við og neglir á markið, boltinn fer af varnarmanni og breytir um stefnu og flýgur því framhjá markmanni Belga og í markið. Óverðskulduð forysta Brasilíu staðreynd. Markið virðist hressa upp á slaka Brasilíumennina, fara að ógna meira og leyfa Belgum ekki að ráða spilinu eins mikið og hingað til. Undir lok leiksins grípa Belgar aftur stjórnina og Brasilíumenn bakka og verjast stórsóknum. Á 87. mínútu ná Brasilíumenn skyndisókn og Ronaldo klárar hana með marki, boltinn í gegnum klofið á markmanni Belga og sigurinn blasir við í stöðunni 2-0. Leiknum lýkur með sigri Brasilíumanna sem vannst á þremur mönnum, markmanninum sem að bjargaði þeim ótal sinnum og markaskorurunum tveimur. Liðið sem tapaði var betra liðið en það var ekki nóg, 16-liða úrslitin virðast einkennast af því að liðið sem að ræður leiknum tapar honum þó vegna góðrar nýtingar varnarliðsins á þeim fáu færum sem það hlýtur.

Davíð og Bush með sömu fasísku tilburðina, sjá þessa frásögn þar sem að nemendum sem voru við útskrift sína var hótað að ef þeir klöppuðu ekki fyrir Bush yrðu þeir handteknir og fengju ekki að útskrifast. Kennari árið 2030: “Mussolini, Hitler, Stalin, Mao, Bush, Oddsson, yeah they were pretty rotten!”. Mér er ekki hlátur í huga, Davíð hefur engan drepið reyndar (svo ég viti) en svona byrja harðstjórnir. Fyrst má maður aðeins tjá sig þegar að það er ekki óþægilegt fyrir stjórnvöld, svo er maður settur í fangelsi ef tjáningin var ekki að skapi stjórnvalda og svo er maður drepinn, þekkt stigmögnun og fyrsta skrefið hefur verið tekið hér á landi, því miður fyrir okkur öll. Lítil þúfa veltir þungu hlassi.

Jæja, að gleðilegri málum, undanfarnar færslur byrjað á þessum skítamálum því miður en ef að maður er ekki vakandi fyrir þessu þá er maður tekinn aftan frá þegar maður á einskis ills von. Ég ætla ekki einu sinni að minnast á sjálfa Kínverjana, orð þeirra um að stærð landsins þýði að erfiðara sé að tryggja mannréttindi (hvernig væri þá að frelsa Tíbet?) og annað bull sem þaðan kemur.

Við fórum í matarboð hjá mömmu, amma og afkomendur hennar að hittast til að minna 70 ára afmælis Dalmanns afa sem lést fyrir aldur fram. Fínn grillmatur, pulsur fyrir þá krakka sem vildu, ís í eftirrétt og súkkulaðimolar sem hurfu eins og dögg fyrir sólu.

Svíþjóð 1-2 Senegal
Svíarnir byrja mjög fjörlega og á 11. mínútu skorar Henrik Larsson með skalla eftir hornspyrnu, vond varnarvinna hjá Senegal. Svíar bakka aðeins og Senegalir sækja, skora mark en það er dæmt af vegna rangstöðu. Henri Camara skorar j-fnunarmarkið á 37. mínútu með góðu skoti fyrir utan vítateig. Seinni hálfleikur eitthvað daufari, bæði lið fá þó ágætis færi. Nú er því farið í framlengingu, þar sem að gullmarksreglan er enn við lýði. Svíar byrja með miklum látum og eiga góð færi. Á 104. mínútu kemst Henri Camara á sprett og skorar gullmarkið með skoti af svipuðum stað og áður. Sárgrætilegt fyrir gott lið Svía sem að átti meira í framlengingunni en það telur ekki. Skemmtilegt en brothætt lið Senegals er komið áfram.

Spánn 1-1 Írland (3-2 í vítum)
Leikurinn byrjar með miklum látum, bæði lið eiga færi og ógna hinu talsvert. Á 8. mínútu nær Morientes góðum skalla og boltinn í netið, Spánn kominn yfir. Írar ná völdum á miðjunni og dæla háum boltum inn á vítateig Spánverja, þar sem smávaxnir írskir sóknarmenn eiga litla möguleika gegn stórum varnarmönnum. Seinni hálfleikur byrjar ekki síður fjörlegar, bæði lið með dauðafæri á upphafsmínútunum. Damien Duff veiðir vítaspyrnu á 62. mínútu en Ian Harte klúðrar henni, lélegt skot hans auðveldlega varið af Iker Casillas. Niall Quinn er skipt inná í stað Gary Kelly, og nú byrja þessar háu sendingar sem Írar dæla inn í vítateiginn að skapa hættu, Quinn er ennþá frábær í sköllunum og matar litlu sóknarmennina á sendingum. Á 89. mínútu reynir Hierro að klæða Quinn úr treyjunni í vítateignum, dómarinn dæmir víti og Robbie Keane skorar örugglega úr spyrnunni á 90. mínútu. Írar ná aftur að jafna í blálok leiksins (og ég missti því af þó nokkrum stigum í draumaleiknum). Framlenging! Spánverjar eru komnir upp að vegg, aðeins einn sóknarmaður inná, og svo missa þeir meiddan miðjumann útaf, búnir með skiptingar þannig að þeir eru aðeins 10 talsins. Írar halda áfram pressunni sem þeir hafa haft nær allan leikinn, en hvorugt liðið nær að skora úr sínum færum. Vítakeppni! Írar klúðra 3 vítaspyrnum, Matt Holland neglir í þverslána, en Connolly og Kilbane skjóta lufsulega beint að Casillas sem þarf lítið að gera til að verja skotin. Juanfran og Valeron skjóta báðir framhjá en Mendieta skorar sigurspyrnuna. Spánn áfram þrátt fyrir erfitt gengi í leiknum.

Írar misnotuðu 4 víti, 3 þeirra voru arfaslök skot næstum því beint á markmanninn. Ótrúlegt að atvinnumenn geri svona á stórmóti í svona lykilleikjum, eitthvað tæpir á taugum.

Hvers vegna er lögreglumönnum beitt til þess að hefta tjáningarfrelsi hér á landi? Hvers vegna er þeim sagt að taka sér stöðu fyrir framan fólk með mótmælaskilti, hvers vegna reyna þeir að standa sem mest fyrir framan mótmælendur með skilti þannig að í þau sjáist ekki? Hvers vegna færa þeir sig nær fólki sem hrópar slagorð? Hvers vegna stendur ríkisstjórn Íslands fyrir því að við megum ekki láta skoðanir okkar í ljós? Hvers vegna er fólki vísað út af hóteli vegna pólitískra skoðana þess? Aldrei aldrei aldrei mun Sjálfstæðisflokkurinn fá mitt atkvæði eftir þetta, hingað til hef ég kosið hann fyrir utan síðustu borgarstjórnarkosningar, en aldrei aftur. Mér líður eins og ég sé sjálfur í Kína, einræðisherrann okkar (eða yfirmarskálkur, fer eftir því hvort hann er í jakkafötum eða einkennisbúningi) segir að mótmælendur megi þakka fyrir að vera ekki hent úr landi með ofbeldi. Davíð í geðrannsókn segi ég, próteinkúrinn sem Davíð hefur verið í er þekktur fyrir skort á ýmsum bætiefnum sem að heilann vantar sárlega, og á hegðun hans og orðfari er augljóst að ekki er allt eins og á að vera í sálartetri hans.

Eftir að ég ritaði ofangreind orð sat ég svo fastur á ljósum í þó nokkurn tíma á meðan að fjöldamorðingjarnir og mannréttindabrjótarnir óku Miklubrautina, hefði átt að drepa á bílnum og steyta hnefann yfir grindverkið, spurning hversu margar mótorhjólalöggur hefðu komið sér fyrir framan mig til að skyggja á mig, og hversu mörgum skotum hefði verið hleypt á mig, bíll forsetans fór framhjá mér í 2 metra fjarlægð, þvílíkur ógnarfjöldi af bílum sem þetta var. Hélt að þetta yrðu bara 10 bílar, ef ég hefði vitað að 20 í viðbót komu á eftir hefði ég nú steytt hnefann betur.

Í annað sinn sem að ég er stoppaður á ljósum svo hægt sé að láta kínverskan fjöldamorðingja keyra óáreittan fram hjá pöpulnum, fyrra skiptið var það Li Peng. Af hverju eru mínir skattpeningar að fara í að hafa 10 mótorhjólalöggur til að stoppa mig og mína samborgara og greiða götu morðingja?

Að gleðilegri og eðlilegri málum, fórum á Miklatún til að sleikja sólina í smá tíma og gleyma heimsku heimsins, ákváðum svo að nýta sólina og borðuðum úti á svölum. Fengum okkur piparsteik og bakaðar kartöflur (ódýrara en pizza) nema hvað að fúllynt ský smellti sér fyrir þannig að eitthvað varð svalara en vonast hafði verið eftir.

Horfðum á American Pie II á DVD, 6 mínútur þar af atriðum sem ekki voru í bíó. Kosturinn við DVD er óneitanlega aukaefnið, sáum þar nokkur atriði sem voru klippt úr, tvö þeirra reyndar settu í samhengi nokkuð ummæli í myndinni sem að komu undarlega fyrir ein og sér. Ágætasta skemmtun, þó nokkur atriði sem hægt er að hlæja mikið að.

Þýskaland 1-0 Paragvæ
Þjóðverjarnir með undirtökin í byrjun, Paragvæ missir sinn þekktasta útileikmann (Chilavert líklega þekktari en hann er í marki) á 29. mínútu, Roque Santa Cruz fer meiddur af velli, Jorge Campos kemur inn í staðinn. Sóknarleikur Paragvæ hressist raunar við þetta, Campos mun sneggri og sprækari en Santa Cruz, Ayala á dauðafæri á 36. mínútu og Campos á frábært skot á 37. mínútu. Þýskaland byrjar seinni hálfleik af miklum krafti, tvö skot á mark á fyrstu tveim mínútunum. Leikurinn jafnast svo og Paragvæ ógna mjög marki Þjóðverja, á 88. mínútu kemur “þýska andartakið”, Neuville skorar eftir sendingu frá Schneider, Þjóðverjar samir við sig og skora á lokamínútunum sigurmarkið. Á 90. mínútu kemur galdramaðurinn Cuevas inn (sem skoraði 2 mörk í síðasta leik en fór útaf meiddur) og gerir sig strax líklegan en tíminn er ekki nógur, Þjóðverjar vinna enn einn sigurinn á seiglunni.

Danmörk 0-3 England
Grenjandi rigning, virðist sem að kvöldleikirnir séu nú allir leiknir í suddaveðri. Englendingar hefja leikinn með einum gömlum langbolta, bara svona að prufa. Á 5. mínútu gerir Laursen mistök og skallar afturfyrir, horn fyrir England. Rio Ferdinand skallar boltann að marki en beint í Sørensen sem að klúðrar gjörsamlega hins vegar, reynir að grípa boltann í fangið en missir hann inn í markið, sjálfsmark hjá markverðinum sem hefur verið frábær í undanförnum leikjum. Danir virðast taka þetta mjög inn á sig og gera fátt af viti. Á 22. mínútu skoppar boltinn í vítateig til Owen sem að klárar færið vel og kemur Englandi í 2-0, heppnisstimpill en vel klárað. Danir orðnir pirraðir, Tøfting fær gult spjald fyrir að slá boltann í jörðina, mér finnst þetta alltaf jafn fáránlegt þegar að dæmt er fyrir svona augnabliks svekkelsi, svo sleppa menn með olnbogaskot, peysutog og hrikalegar tæklingar? Á 44. mínútu missa Danir boltann klaufalega í innkast, Englendingar taka það strax, Jensen skallar beint á Beckham sem sendir á Heskey fyrir utan teig og hann neglir á markið, boltinn spýtist á grasinu og undir Sørensen, 3-0 og hálfleikur ekki kominn. Danir eru síst sprækari eftir hlé, andlausir og dofnir og Olsen þjálfari gerir enga breytingu af viti. Englendingar vinna verðskuldaðan sigur á dönsku liði sem að virðist hafa slegið sjálft sig úr leik með taugaóstyrk og klaufaskap.

Mig grunar að Davíð hafi ekki tekið eftir því, að þó að Björn Bjarnason hafi mælt með því að hér yrði stofnaður íslenskur her, þá fór það aldrei í gang. Davíð stendur því fast á því að Ísland sé nú herstöð, og hann sem yfirmarskálkur því alvaldur. Það skýrir auðvitað drottningarviðtölin hans og það hvernig hann gerir lítið úr öllum öðrum en sjálfum sér í samtölum, eini maðurinn sem kemur illa út er auðvitað Davíð marskálkur sjálfur.

Spurning hvort að Davíð mæti í tindátabúningi á 17. júní? Íbúar Camp Ísland eiga þá væntanlega að hrópa ferfalt húrra fyrir honum.

Í dag kláraðist riðlakeppnin á HM, á morgun hefjast 16-liða úrslit. Það er ekki hægt að segja annað en að þetta hafi verið skemmtilegasta HM í áraraðir. Mörg óvænt úrslit, nærri öll liðin hafa lagt áherslu á sóknarknattspyrnu og mörkin eru að meðaltali 4 í leik eða svo held ég. Knattspyrnuheimurinn er að breikka, sem að má sjá á því að stórveldi eru felld af ríkjum sem að voru lægra skrifuð.

Belgía 3-2 Rússland
Fyrir mótið bjóst ég við skemmtilegum tilþrifum frá Belgum. Það hefur látið standa á sér en í þessum leik sýndu þeir loksins það sem að ég beið eftir. Nokkrar breytingar á liðinu frá síðasta leik (enda arfaslakir þar) og þetta byrjar fjörlega. Walem skorar úr aukaspyrnu á 7. mínútu og Belgar sækja stíft á dapra Rússana. Ungstirnið Sychev kemur inn sem varamaður hjá Rússum, honum hefur verið líkt við Michael Owen, ungur, snöggur og flinkur framherji. Hann bjargaði þeim einmitt gegn Túnis, og hér tekur hann strax málin í sínar hendur, á sendingu á Becashtnych sem að jafnar metin á 52. mínútu. Belgar eiga unga sóknarmenn líka, Wesley Sonck er skipt inná og nokkrum sekúndum síðar skorar hann með skalla eftir hornspyrnu, þetta er á 78. mínútu. Marc Wilmots kemur svo Belgum í 3-1 á 82. mínútu með góðu skoti fyrir utan vítateig, og Belgar virðast öruggir í 16-liða úrslit. Sychev er ekki sammála, skorar á 89. mínútu og nú vantar Rússa aðeins eitt mark enn til að komast áfram. Talsverð læti í Rússunum lokamínúturnar en það dugar ekki til, Belgar vinna verðskuldaðan sigur á Rússum og senda þá heim.

Japan 2-0 Túnis
Túnis voru þokkalegir á móti Rússum og voru óheppnir að tapa þeim leik en áðurnefndur Sychev kom þar Rússum til bjargar. Fyrri hálfleikur var mikil ládeyða, en Japanir gerðu skiptingar í hálfleik og þær skiluðu sér. Varamaðurinn Moroshima skorar glæsilegt mark á 48. mínútu eftir sendingu frá varamanninum Ichikawa. Á 75. mínútu á svo Ichikawa góða sendingu fyrir markið og þar mætir Hidetoshi Nakata og skallar boltann í markið. Japanir verið sprækari, kannski orðnir þreyttir enda búnir að vera á fullri keyrslu allt mótið.

Pólland 3-1 Bandaríkin
Svakalegar upphafsmínútur, Pólland skorar á 3. mínútu, Olidasebe með skot í þverslána og inn. Á 4. mínútu skorar Landon Donovan mark fyrir Bandaríkin en það er dæmt af, hann braut á varnarmanni Pólverja. Á 5. mínútu skora svo Pólverjar aftur, nú Kryzalowisch. Algjör handboltabyrjun, sóknir á báða bóga. Pólverjar bakka svo og Bandaríkjamenn hefja miklar sóknaraðgerðir sem að stranda á hávaxinni og þéttri vörn Pólverja. Pólverjar fá reyndar betri færi, hraðaupphlaup þeirra mjög hættuleg og varnarmönnum Bandaríkjanna reynist erfitt að taka boltann af mönnum á ferð. Bandaríkin gefast upp á að gefa bolta inn í þéttsetinn teiginn og fara að skjóta á markið af mislöngu færi. Á 65. mínútu kemur Zewlakow inná og skorar mínútu síðar, 3-0! Ungstirnið Landon Donovan skorar á 83. mínútu og Bandaríkin fá nokkur færi en tekst ekki að skora. Þurfa nú að treysta á Suður-Kóreu til að komast áfram í 16-liða úrslit.

Portúgal 0-1 Suður-Kórea
Portúgalir geta komist áfram ef þeir fá stig og Bandaríkjamenn tapa. Geggjuð læti á vellinum þar sem 65.000 áhorfendur öskra úr sér lungun og raddböndin, ógurlegasti dynur sem ég hef heyrt, og var þó á HM98 þar sem króatísku áhangendurnir voru svakalegir og sungu án hvíldar í 2.5 tíma. Bæði lið láta boltann ganga vel og spila fínan fótbolta, minni hreyfing er á leikmönnum Portúgal en Suður-Kóreu, og því komast Evrópustjörnurnar lítt áleiðis að marki. Luis Figo lætur stela af sér boltanum hægri vinstri og virðist bara ekki vaknaður. Suður-Kóreumenn spila fínan fótbolta, boltinn gengur vel og mikil hreyfing þannig að alltaf er hægt að finna lausan mann, komnir með hollenska stílinn alveg fantaflottann. Ná reyndar ekki að skapa sér marktækifæri enda vörn Portúgala glaðvakandi í þetta sinn. Suður-Kóreumenn fara mjög fast í alla bolta og það pirrar Portúgalina. Joao Pinto tapar boltanum hvað eftir annað og lætur það fara í taugarnar á sér, fer í vafasama tæklingu á 27. mínútu og fær rauða spjaldið fyrir. Strangur dómur en fyllilega samkvæmt bókinni. Portúgalir bakka aftar og markmenn sjá varla boltann í hálfleiknum. Suður-Kórea byrjar seinni hálfleikinn af miklum krafti, Portúgalir halda sig aftarlega og leyfa þeim að koma, gæti reynst hættulegt gegn kvikum og snöggum andstæðingum. Á 65. mínútu fær Beto sitt annað gula spjald fyrir minniháttar brot og nú eru Portúgalir aðeins 9 á vellinum, og þulirnir froðufellandi (enda mikil eftirsjá að þessu frábæra liði). Portúgalir eflast við þetta en Suður-Kóreumenn hægja ferðina, á 70. mínútu fá þeir hornspyrnu og Park Ji Sung tekur vel á móti boltanum og klárar glæsilega, 1-0 og Portúgalir tveimur færri og marki undir og því á heimleið. Nú hefst einhver svakalegasti kafli keppninnar, Portúgalir verða hamrammir og skipta yfir í 3-2-3 leikkerfi, varnartröllið Couto færir sig fram í miðherjann og gerir þar mikinn usla. Allir leikmenn Portúgals berjast eins og ljón og Suður-Kóreumenn bakka gegn svona brjálæðingum. Portúgalir eiga færi eftir færi, og varamaðurinn Nuno Gomes klikkar hrikalega þegar hann kemst einn á móti markmanni en hálfsest á boltann. Sergio Conceiçao á skot í stöngina og boltinn skýst meðfram marklínunni og burt, skömmu seinna á hann glæsispyrnu sem markmaðurinn ver, grey töframaðurinn gráti næst að sjá boltann forðast netið eins og heitan eldinn. Vitor Baia bjargar þrisvar maður á móti manni þegar að portúgalska vörnin er búin að minnka niður í 2 menn. Mikil læti og dramatík síðustu mínúturnar en inn vildi boltinn ekki. Loksins sáum við hvernig Portúgal getur leikið fótbolta, en það kom tveimur og hálfum fótboltaleik of seint. Dómarinn var arfaslakur og ósamkvæmur sjálfum sér, en það eru Bandaríkin sem komast áfram á þessu eina marki Suður-Kóreu. Mikil synd. Nú er bara vonandi að Suður-Kórea slái næstu andstæðinga sína út, Ítali.

Áhugavert:

Það held ég að Davíð sé búinn að tapa sér gjörsamlega í einræðistilburðunum, það nýjasta nýtt er að Ísland er orðið að herbúðum! Þar á víst að ríkja agi segir hann, eða orðrétt: “Íslenskur almenningur veit það og skilur þegar hann skoðar málið að það þarf að vera agi í herbúðunum.” (Fréttablaðið, 13. júní 2002). Svo finnst honum voðalega grunsamlegt að þetta fólk nenni að koma hingað til að mótmæla, hvað þá að það hafi efni á því, eða jafnvel borgi farið ekki sjálft! Spurning hvort að Osama er á bakvið þetta… hann er jú fjársterkur.

Leiðari Morgunblaðsins er að minnsta kosti að bera í bætifláka fyrir Davíð, verst að kallanginn er steinblindur. Ekkert orðið var við almenna óánægju með þessa ákvörðun.

Bakið á mér alveg að drepa mig í dag, komst ekki fram úr rúmi fyrr en um 11, ég sem hef hingað til farið á fætur klukkan sex til að horfa á leikina. Gerði reyndar heiðarlega tilraun til þess í morgun en náði ekki að lyfta höfði frá kodda sökum bakverkja sem voru suddalegir, missti andann í hvert sinn sem ég hreyfði mig.

Örn leit við í hádeginu til að horfa á boltann og kom með langloku, ég lagði ekki einu sinni í að fara niður stigann til að opna millihurðina þannig að ég lét taka þar úr lás.

Pabbi leit svo við með kínverskan mat handa mér, Sigurrós skrapp í vinnuferð á Selfoss.

Jæja, boltinn. “Spekingarnir” núna að tuða eitthvað með að Tyrkir spili leiðinlegan fótbolta, sáu greinilega ekki leikinn við Brasilíu og finnst lítið til þeirra koma.

Tyrkland 3-0 Kína
Lá uppí rúmi sárkvalinn, sá þennan leik því ekki því miður, en mörkin voru sæmileg. Tyrkirnir eiga það fyllilega skilið að komast áfram.

Kosta Ríka 2-5 Brasilía
Lá uppí rúmi, sá bara síðustu mínútur leiksins. Kosta Ríka börðust vel en Brasilíumenn voru bara of góðir, þó að hálft byrjunarlið síðustu leikja væri hvílt.

Mexíkó 1-1 Ítalía
Leikurinn byrjaði fjörlega, Mexíkóar heldur betri en Ítalir náðu að ógna markinu oftar. Skora á 13. mínútu en markið dæmt af vegna rangstöðu. Á 35. mínútu klára Mexíkóar glæsilega sókn með glæsilegu marki, 20 sendingar fyrir utan vítateig Ítala, fyrirgjöf frá Blanco og Borgetti skallar frábærlega í netið. Mexíkóar réðu leiknum lengst af, Ítalir voru einna helst í skyndisóknum og ógnuðu markinu talsvert. Del Piero er skipt inná og hann nær að jafna á 85. mínútu. Tryggir Ítali áfram í 16-liða úrslit.

Króatía 0-1 Ekvador
Andlausir Króatar á móti sprækum Ekvadorum. Ekvador skorar verðskuldað mark en Króatar reyna talsvert á stangir og þverslá þeirra, Ekvadorar bjarga á línu af og til en Króatar virðast samt ekki nógu hungraðir. Detta úr keppni með þessum ósigri, ekki sami krafturinn og var í þeim 1998, þar sem ég sá þá spila 3 leiki í Frakklandi.

Jesús minn almáttugur. Er reyndar yfirlýstur guðleysingi en þegar grípa verður til stórra upphrópanna þá skilja allir þessa. Við Sigurrós skruppum á Star Wars:Episode 2, langa myndin með B-myndanafninu. Auk þess að hafa þetta B-myndanafn þá eru samtöl og leikur af B-standard, hægri vinstri, besti leikarinn er án efa Yoda, sem að er tölvuteiknaður. Umgjörð myndarinnar er að sjálfsögðu mjög flott, öll grafík er flott, umhverfi, farartæki og fleira, tæknileg útfærsla næstum gallalaus (næstum því…). Yoda að berjast er án efa atriði myndarinnar. Sé horft framhjá öllum bardögunum og eltingarleikjunum hins vegar þá er þetta frekar óburðug mynd með ósannfærandi söguþræði, vondum samtölum og stirðbusalegum leik undir slappri leikstjórn. Ég telst hins vegar til örfárra sem að líta svona á myndina, flestir gleyma sér bara í sprengingunum, rifnum fötum, geislasverðum og Mættinum. Verði þeim að góðu, þetta er að sjálfsögðu upplifun að sjá svona stóra (löng og mikið af brellum) mynd, en hefði hún ekki getað orðið betri ef að alvöru höfundur hefði skrifað samtölin og stoppað í götin í handritinu og alvöru leikstjóri hefði leikstýrt góðum leikurum? Svona er maður nú, krefst alltaf þess besta.

Við fórum á myndina í Smárabíói, enda bestu salirnir þar. Ekki alveg eins kalt núna og síðast, skondið að vera í stuttermabol í 20°C hita úti, fara svo inn í sal og vera kominn í 12°C, ennþá á stuttermabolnum. Sætin eru hins vegar algjör martröð fyrir þá sem að vilja halda bakinu á sér í lagi. Í hléinu var ég á leiðinni aftur í salinn en fékk þá gífurlegt þursabit, nokkuð sem ég hef ekki fengið mánuðum saman. Seinni hluta myndarinnar horfði ég á í reygðri stellingu til að halda bakinu þokkalegu. Ég ætla nú að benda Smárabíósmönnum á að þessi bök eru stórhættuleg, hef heyrt sjúkraþjálfara segja að þetta séu allra verstu bök sem að baksjúklingar geta fundið á þessu landi.

Ég býst við því að þeir muni gera eitthvað í þessu, af hverju að eyða milljónum í fín sæti, flotta sali og góða aðstöðu þegar að þeir svo gera alla bakveika sem þangað fara í bíó. Það væri best fyrir þá og viðskiptavini þeirra ef þeir myndu breyta bökunum til hins betra og geta þá auglýst sig sem bakvænt bíó, eða bara ergónómískt (ergónómía er fræðin sem miðar að því að gera aðstöðu manna betri, stólar sem að fara ekki illa með bakið, skæri sem að meiða ekki þá sem þau nota, betri lyklaborð, betri mýs og svo framvegis).

Þá að boltanum sem er að sjálfsögðu að rúlla af miklum móð.

Svíþjóð 1-1 Argentína
Chamot spjaldasafnari, Almeyda og Aimar komnir í byrjunarlið Argentínumanna. Argentínumenn byrja mjög sterkt og eiga leikinn, Svíar verjast hins vegar og gera það vel. Hálfleikur nálgast og Argentínumenn farnir að pirrast á því að geta ekki skorað hjá sterkri vörn og góðum markmanni Svía, gemlingurinn Claudio Caniggia brúkar kjaft á bekknum og er rekinn upp í stúku, ekki glæsilegur sprettur á þessu HM hjá honum. Anders Svensson, sem að hefur nýst manni vel í Championship Manager í gegnum tíðina, skorar úr glæsilegri aukaspyrnu á 59. mínútu og Svíar eru í góðum málum. Argentínumenn sjá nú fram á að vera slegnir út og halda áfram að ógna marki Svía, það er ekki fyrr en á 88. mínútu að þeir skora. Ortega fær víti, tekur það sjálfur en Hedman ver, Crespo nær boltanum og skorar. Við endursýningu kemur í ljós að Crespo er kolrangstæður í raun, var kominn samhliða Ortega þegar að hann tók vítið, markið er því ólöglegt en línuvörðurinn klikkar á að dæma. Svíar eiga svo dauðafæri, en leiknum lýkur með jafntefli. Svíar komnir áfram en stórveldið Argentína fer heim með fyrstu flugvél, þvílíkt áfall fyrir þá sem og keppnina. Bielsa hefði betur tekið Saviola með.

Nígería 0-0 England
Fyrir leikinn bjóst ég við Nígeríumönnum mjög grimmum, það væri of mikill skandall ef að þeir fæmu án stiga frá þessu móti. Á þennan leik er hins vegar ekki orðum eyðandi, 3 færi á lið og svo þess á milli gerðu þau sitt besta til að tefja tímann. Vildu greinilega bara sættast á leiðinlegt og ljótt 0-0 jafntefli og það fengu þeir. Leiðinlegasti leikur HM.

Slóvenía 1-3 Paragvæ
Paragvæ byrja af krafti, þeir þurfa sigur og ætla sér greinilega að fá hann. Á 20. mínútu fær Paredes sitt annað gula spjald og er réttilega rekinn út af. Paragvæ eru orðnir 10 og þurfa nú virkilega að bretta upp ermarnar. Þeir gera það og setja mikla pressu á Slóvenana. Slóvenar hressast síðustu mínútur hálfleiksins þegar þreytan fer aðeins að segja til sín hjá Paragvæum, og skora í viðbótartíma, boltinn fer klaufalega í gegnum klofið á Chilavert og af fæti hans í markið eftir skot frá endalínu. Slóvenar byrja seinni hálfleik af krafti og fá fjölda færa. Nú er ég eiginlega farinn að afskrifa Paragvæ. Nelson Cuevas er skipt inná í lið Paragvæ og er ekki búinn að vera nema 5 mínútur á vellinum þegar hann skorar jöfnunarmarkið með góðu einstaklingsframtaki á 66. mínútu. Paragvæ eiga von, en þurfa að vinna, helst með tveimur til að vonin rætist. Varamaðurinn Jorge Campos kemur svo Paragvæ yfir á 73. mínútu með góðu langskoti. Cuevas tryggir svo sigurinn með glæsilegum tilþrifum og neglir í þverslá og inn á 84. mínútu. Hann meiðist svo og er tekinn útaf á 90. mínútu. Var inná í tæpan hálftíma og skoraði tvö mörk, ekki slæmt. Frábær barátta í liði Paragvæ, hjálpuðu sjálfum sér til að ná í 16-liða úrslit.

Spánn 3-2 Suður-Afríka
Spánverjar gera miklar breytingar, leyfa fleiri leikmönnum að taka þátt, sem ég er bara ánægður með. Á 4. mínútu missir Arendse markvörður SAF boltann frá sér klaufalega og Raúl skorar auðvelt mark. Spánverjar halda áfram að sækja og nýju mennirnir eru sprækir og vilja sanna sig. Suður-Afríkumenn berjast vel og ná að jafna á 31. mínútu, Benni McCarthy klárar loks færi á þessu móti. Mendieta vinnur aukaspyrnu á 45. mínútu og skorar úr henni sjálfur, Arendse illa staðsettur. Lucas Radebe jafnar á 53. mínútu með skalla, Suður-Afríka að spila ágætlega og fjarri því að láta traðka á sér. Á 56. mínútu gefur svo Joaquin glæsilega sendingu inn á teig sem að Raúl skallar í netið. 3-2 fyrir Spán. Suður-Afríkumenn berjast áfram en ná ekki að setja fleiri mörk, þeir detta því úr leik eftir hetjulega frammistöðu.

Áhugavert: