Í kvöld tók ég þátt í líklega stærstu orrustu sem hefur verið í EVE frá útgáfu.
Forsagan er sú að nokkur fyrirtæki (félag/klan í EVE) reyndu að ná stjórn á svæði sem margir aðrir eru á, skutu á fólk til að bola því í burtu.
Margir brugðust reiðir við og söfnuðu saman liði.
Já, sumir dagar eru svona.
Frá Ammríkunni.. hvor er meiri lygalaupur, Clinton eða Bush?
Þetta var fínn dagur í græjuheiminum, fyrst fékk ég Armageddon orrustuskip í EVE og síðan fengum við Sigurrós stafræna myndavél sem lengi hefur verið á dagskrá hjá okkur. Búast má við einhvers konar myndaflóði eftir þetta.
George Orwell virðist hafa verið bloggari á sinni tíð, sama má segja um fjöldamarga sem hafa skrifað eða flutt reglulega pistla í hina ýmsu fjölmiðla.
Þetta er líklega með sjaldgæfustu dauðdögum veraldarsögunnar, sorglegt slys.
Sem oftar þá eru það fréttir að vestan sem nóg er að finna um, þar má nefna það að þingmenn vilja fá hjólreiðamenn aftur í bílana, vörur með innbyggð strikamerki sem valda mörgum áhyggjum og rannsókn sem ber saman íhaldsmenn ýmiss konar, þeirra á meðal Reagan, Hitler og Stalín.
Í dag var minnst á það í vinnunni hversu náfölur ég væri. Metsól hefur ekkert í smá veikindi og innivinnu að gera.
Mikill fjöldi kvenna kannast við PopCap Games þó ekki nema óbeint sé. Það fyrirtæki býr til heilan helling af þrautaleikjum sem eru gríðarlega vinsælir. Það stendur víst einna best að vígi af litlu leikjafyrirtækjunum sem eru að höfða til þeirra sem að eru ekki mikið fyrir skotleikina sem eru vinsælastir.
Fræðimaður í Bandaríkjunum auglýsir hér verk sín og segir lestrarkennslu hafa verið á villigötum undanfarin 80 ár.
Já… klukkan fimm í nótt fór ég í ofboði á salerni heimilisins og var þar í klukkutíma. Heilsan var ekki mikið skárri þegar ég vaknaði stuttu síðar til að mæta í vinnu, ég var því heima við í dag en gerði mitt besta til að redda málum í vinnunni með því að liggja í símanum.
Sigurrós var ekki mikið skárri sökum hita en mætti þó til vinnu.
Gullkorn dagsins er:
We have a unique form of government where we recognize our rights do not come from a king or a ruler but from God
Þetta segja mennirnir sem ætla að setja “In God We Trust” á opinberar byggingar. Þeir kannast ekki alveg við það hvernig aðrir valdhafar, þar með taldir flestir kóngar, segjast hafa þegið vald sitt einmitt frá Guði. Snillingar þessir nýíhaldsmenn.
Jæja ég gæti eytt mörgum orðum í íslenska nýíhaldsmenn (e: neoconservatives) en ég held að þessi hugmynd dæmi sig sjálf:
Björn hvetur til stofnunar varnarsveitar hér á landi
Fyndið samt að þeir nefna sig frjálshyggjumenn! Sorglegt kannski frekar?
Að skemmtilegri tíðindum, stafrænar myndavélar eru orðnar það góðar og stjörnukíkjar viðráðanlegir fyrir áhugamenn að áhugamenn eru að taka myndir sem jafnast á við milljarða króna tæki. Þessi mynd er ofurflott… hún sýnir Merkúr eins og títuprjón fyrir framan Sólu.
Nokkrir annmarkar á Google eru nefndir hér, dæmi um ofgnótt upplýsinga sýnist manni.
Að lokum má nefna það að vísindamenn eru að búa til músagildrur sem nota ekki beitu en eru búnar til úr plasti og súkkulaði sem er brætt inn í það.
Já, eftir gleði gærdagsins sem má lesa nánar um hjá Sigurrós þá vorum við eitthvað róleg í dag.
Comic-Con ráðstefnunni lýkur í dag, þar má meðal annara sjá Neil Gaiman og Wil Wheaton, ágætis grein um staðalmyndir litaðra, samkynheigðra og kvenna í teiknimyndasögum má lesa hér.
Áhugaverð þessi frétt um að stjórnarherrarnir í Ameríku einbeita sér að því að kæfa niður fréttir eða gera ótrúverðugar í stað þess að redda vandamálunum sem þeir komu sér rækilega í. Heill herskari af CIA, NSA og fyrrum yfirmönnum í hernum sem nú eru komnir á eftirlaun er búinn að gagnrýna hvernig ráðamenn fóru í stríð án þess að hafa Plan B, vildu bara heyra og sjá þau gögn sem studdu þeirra skoðanir og stofnuðu meira að segja sér skrifstofu sem sá um að flytja bara þau boð sem menn vildu heyra.
Með allra stærstu klúðrum í sögu hernaðar og stjórnmála segja menn, nýíhaldsmennirnir að skíta verulega illa á sig og á saklausa borgara ýmissa landa.
Talandi um nýíhaldsmenn… þeir eru æfir yfir því að CBS stöðin segi að hommar sem taka þátt í Amazing Race 4 segist vera giftir, enda sé ekki hægt að vera giftur ef maður er hommi í Ameríku.
Nýíhaldsmenn á Íslandi kalla sig frjálshyggjumenn… smá Orwellíska.
Í dag átti spúsan mín afmæli og hélt upp á það í kvöld með lítilli grillveislu þar sem tvær æskuvinkonur hennar og fylgdarsveinar þeirra mættu.
Grill, vel ættað áfengi, kaka og fleira góðgæti vakti stormandi lukku allra og kvöldið var einstaklega vel heppnað. Umræður fóru um víðan völl, allir viðstaddir voru vel með á tölvunótunum, bíónótunum og fleiri nótum sem ekki má tala um þegar ólögráða eru viðstaddir. Frábært kvöld með frábæru fólki!
Jæja, lítið heyrist nú frá þeim sem hrópuðu að Samkeppnisstofnun væri á nornaveiðum þegar hún gerði húsleit hjá olíufélögunum. Þeir hrópuðu hátt og snjallt að leggja ætti þessa stofnun niður, nú heyrist ekki píp. Kannski af því að búið er að sanna þvílíkt samráð?
STEF skandalísera enn eina ferðina og sýna hversu forheimskt það batterí er. Listamönnum er ekki greitt eftir raunspilun laga heldur eftir vinsældarlista Bylgjunnar og Rásar 2 eða eitthvað álíka gáfulegt. Það nýjasta er að rukka harmonnikuleikara um STEF-gjöld fyrir að hann spili eigin tónlist. STEF segist vera alveg sama hvort tónlistin sé frumsamin eður ei, opinber flutningur þýðir að þú verðir rukkaður og andskotinn hafi það!
Blair er svo búinn að segja að sagan muni dæma þá stríðsherrana réttlátlega, það er eins og þeir vilja. Sigurvegarar skrifa víst söguna en það er reyndar orðið erfiðara nú á tímum fyrir þá. Þeir reyna það þó alveg hikstalaust.
Jæja, bara áframhaldandi glimrandi veður í dag.
Fór til AGA með gamla járnkútinn og fékk plastkút í staðinn. Þeir eru þeirrar náttúru gæddir að hægt er að sjá gasið í þeim og meta þar af leiðandi hvenær þarf að skipta. Þeir eru svo á vaktinni með heimsendingarþjónustu alla daga (líka helgar) á milli 10-22 þannig að ef að gasið klárast í miðju grillpartýi um helgi þá er það bara eitt símtal til að redda því. Mér finnst þetta bara svo frábær þjónusta að ég bara verð að segja frá.
Nýi markmaðurinn hjá Mancester United er með Tourette. Ágætis viðtal við hann og grein hérna.
Ekki var fyrr búið að birta frétt um nýjar og erfiðari boðleiðir til Bush (þar sem maður þarf til dæmis að tiltaka í erindi hvort maður sé sammála honum eða andsnúinn, enginn millivegur þar) fyrr en allir flykktust að athuga þetta og gerðu illt verra.
Meira frá Ameríkunni, þar er nú lítið flugfélag að setja upp þvílíkt myndavélakerfi sem fylgist með öllu sem gerist um borð í flugvélinni (nema á salernum). Upptökur verða svo hugsanlega geymdar í 10 ár!
Maðurinn sem fyrstur skráði Sex.com og barðist seinna hatrammri baráttu fyrir dómstólum til að fá það frá ræningja er nú að vandræðast við að láta það skila hagnaði. Hann hefur víst ekki reynst besti stjórnandinn sem völ er á.
Hinum megin við hafið tekst að minnsta kosti einum manni að hafa lifibrauð af því að blogga.
Í Frakklandi hafa svo nýnasistar og öfgasinnaðir gyðingar gert hið ótrúlega og sameinast í hatri sínu á múslimum.
Varðandi Ann Coulter mynd gærdagsins þá talaði ég stuttlega um þessa konu í færslu um daginn en hún er til dæmis klár á því að allir sem lentu í klóm Joseph McCarthy og félaga hafi bara verið helvítis kommúnistar og ekkert flókið með það að gefa út skotleyfi á þá. Að líkja henni við vonda norn í Oz var kannski ósanngjarnt í garð nornarinnar.
Haldin var minningarathöfn um Marc-Vivien Foe í Manchester í gær. Maður klökknar við að lesa greinina og ummæli allra þeirra sem skilja eftir skilaboð.
Grunur leikur á að Foe hafi haft hjartagalla sem heitir HCM á ensku. Minningarsjóður um tvítugan dreng sem lést á svipaðan hátt gerir sitt besta til að koma í veg fyrir að slíkt gerist aftur. Foreldrar hans mæta með sérfræðinga og skoða hundruðir í einu til að athuga hvort að leyndur galli sé til staðar.
Svei mér þá ef að sumir sem maður þekki sýni ekki sum þeirra einkenna sem geta bent til óeðlilegrar hjartastarfsemi… það verður að skoða þessi mál vandlega, það gæti bjargað lífi.
