Jóhannes Birgir Jensson

Jæja já. Setti upp Debian einu sinni enn á vefþjóninum, ein lokatilraun í nánd við að setja upp RAID (tækniheiti).

Ítrekaðar björgunartilraunir héldu áfram að bera engan árangur á fartölvunni, því var síðasta hálmstráið gripið og Gluggar (Windows) settir upp á nýtt. Öll gögnin héldust inni en núna þarf ég að keyra uppsetningu (setup) fyrir flestöll forritin sem ég notast við, aðeins einstaka sem að geta keyrt án þess að troða einherjum .dll skrám og fleiru í kerfismöppuna.

Sigurrós er komin á RSS-listann.

Þetta var íslensk færsla, með tveimur tækniskammstöfunum.

Þetta er búin að vera hrikaleg helgi . Debian-uppsetningin hefur klúðrast nokkrum sinnum sökum þess að RAID-1 er ekki að fara í gang hjá okkur, og höfum þó lesið einar 4-5 How-To greinar á netinu. Allt annað var komið í himnalag, en raid-fimleikarnir þurrkuðu það allt út (bókstaflega).

Kiddi benti mér á að ég er með TV-Out á fartölvunni, þannig að í dag prófaði ég það. Það virkaði ágætlega, nema að allt varð svarthvítt þegar ég fór í “Full screen”, þannig að ég fór á opinberan uppfærsluvef Microsoft, og náði þar í nýja skjárekla sem að opinber uppfærsluvefur Microsoft mælti með. Opinberi uppfærsluvefur Microsoft má núna éta það sem úti frýs fyrir mér, því að núna krassar fartölvan í hvert sinn sem hún er ræst eðlilega upp, og bláskjárinn sem kemur vísar á… nýja skjárekilinn sem að hinn æruverðugi opinberi uppfærsluvefur Microsoft benti á. Ég er búinn að taka þennan skjárekil út og setja hann inn aftur, ég er búinn að setja eldri skjárekla inn og alltaf er sama niðurstaðan, bláskjár þar sem að nýi/gamli skjárekillinn er tilfnenfndur sökudólgur. Ég er orðinn hrikalega pirraður á þessu, síðasta alvarlega reklavandamálið frá Microsoft sem að ég (og Sigurrós) lenti í var ekki lagað fyrr en mörgum mánuðum seinna, í nokkru sem nú er þekkt sem Þjónustupakki 2.

Ég neita að lifa við það að þurfa að keyra fartölvuna mína í svokölluðu VGA-mode (en þá eru skjágæðin afskaplega takmörkuð), ég er farinn til Seattle að öskra á nokkra vel valda einstaklinga.

En vitiði hvað… Sheffield Wednesday vann um helgina… og það er ekkert að hjálpa mér.

Svarti bíllinn minn sem pabbi gerði svo glæsilegan er orðinn öskugrár af salti og drullu, í örfáa klukkutíma var hann hreinn og flottur.

Færði alla vefina yfir á varaþjóninn í dag, straujaði því næst aðalvefþjóninn og fór að byrja á Debian uppsetningu. Ætlaði að vera voðalega duglegur og lesa mig í gegnum allt og leysa ferlið sjálfur en þegar að netsamband lét á sér kræla kom Kiddi til bjargar. Hann tók við uppsetningunni og nú er aðeins eftir að gera vélina raidaða áður en ég fer að flytja vefina aftur yfir og stilla og svona á morgun.

Mér finnst öll umgjörðin í kringum suður-ameríska dansa mjög fyndin, svona búningur held ég að sé standardinn, konurnar súkkulaðibrúnar í því sem næst engu, og karlarnir súkkulaðibrúnir með opið í bringu og löðrandi hár. Fínir dansar, fyndin umgjörð.

Áfram með umræðuefni úr ölllum áttum, í Mogganum í dag voru auglýsingar vegna prófkjörs Sjálfstæðismanna í Kópavogi. Fyndið að sjá allt sama fólkið í þessu og síðast og þarsíðast (þegar að ég var viðriðinn þetta svo um munaði, er núna óflokksbundinn með öllu). Sá reyndar að einn frambjóðandinn til 1.-2. sætis var búinn að reyna að gera sig virðulegri með því að safna smá skeggi, mér fannst það ekki vera að virka (né kjósendum samkvæmt þessum tölum).

Áhugavert:

Það er víst svo að þegar að skipunina su vantar í linux stýrikerfið hjá manni, þá eru góðar líkur á að óprúttinn aðili hafi komist inn á hana og fiktað. Þá er öruggast að strauja gjörsamlega allt og byrja upp á nýtt. Í kvöld hef ég því verið að vinna í því að færa vefina aftur yfir á varavélina, áður en ég fer að setja upp Debian (linux-dreifing).

Mike benti mér á það að núna vilja G14 (stærstu lið Evrópu) fara að loka meistaradeildinni gjörsamlega fyrir minni þjóðum, svo að Íslendingar og Norðmenn (sem þeir nefna sérstaklega til sögunnar) fari ekki að þvælast fyrir flottu fótboltaliðunum þeirra. Þannig að skamm á Rosenborg fyrir að vera eitthvað að vinna þessi glæsilið, bara hættum að hafa Rosenborg með. Áhugaverð lausn. Ég tryllist ef þetta verður málið, Mike er nú þegar að semja yfirlýsingu fyrir hönd WFF.

Að lokum, þá er leiðinlegt að sjá hvað Bandaríkjamenn eru tilbúnir að stimpla allt með “Made in USA” og “USA No 1!” stimplunum sínum. Nú eru grey vetrarólympíuleikarnir að fá að kenna á því. 15.000 hermenn að auki ásamt herþyrlum og orustuþotum. Bush mælti svo fleyg orð: “I’m so confident about the security situation that I came,”.

Áhugavert:

Fann áhugaverðan miðil í dag, af Vefgáttinni minni fór ég á Salon (sem oftar áður), þaðan fann ég svo Phoenix New Times, mjög vandaðan fréttamiðil í Arizona. Þar fann ég svo aftur mjög áhugavert ritsafn um hvalveiðar, þar sem að þessi grein vakti mikinn áhuga minn. Góð blaðamennska, nokkuð sem að skortir hér á landi. Hugsa að ég kíki á þennan miðil oftar.

Hitti pabba í dag þegar ég fór í bankann að ná í eyðublöð fyrir greiðslumat (já, maður er víst að fara að taka stökkið…). Hann skipti við mig á bíl og á meðan að ég var í vinnunni þreif hann bílinn og skrapp með hann til Brynjars pústkalls sem að lagaði verstu óhljóðin. Mazdan var farin að halda sig Lödu, og þó að eftirhermur séu ágætis skemmtikraftar þá var þessi orðin frekar þreytt.

Áhugavert:

Það snjóaði það mikið í gærkveldi og í nótt að núna lítur allt út eins og á póstkortum frá Sviss og öðrum snjóþungum stöðum, 5 sentimetra lag ofan á hverri einustu trjágrein.

Sigurrós var að opna bloggið hjá sér, ég óska henni að sjálfsögðu til hamingju með það, gaman að fá fleiri góða penna á netið, hún er annars búin að vera að skrifa síðan 1. janúar en opnaði það ekki fyrr en núna.

Var þokkalegur í bakinu í dag, þar til að ég fór í skólann, verri vinnuaðstaða þar en heima.

Sé að maður þarf að fá sér Stöð 2 og Sýn í júní og júlí til að sjá HM. Spurning hvort þeir ætli að vera ógeðslegir refir og selja bara 6 mánaða pakka… eða hvort þeir ætli að vera almennilegir og selja okkur bara þá 2 mánuði sem maður vill.

Var að færa vefþjóninn til og tengja aftur í hillu í þokkalegri hæð og var í undarlegri fettu þegar ég hélt turninum uppi með annari hendi og tengdi að aftan með hinni. Held ég hafi tognað í baki, fór snemma heim úr vinnu og geng nú um skakkur og skældur, aðeins skánað verkirnir með kvöldinu en samt helvíti vont.

Maður gleymir því alltaf eftir smá tíma að maður þarf að passa bakið á sér, eftir að hafa tognað tvisvar áður (körfubolta og fótbolta…).

Áhugavert:

Vefþjónninn byrjaður að hiksta enn meir en áður. Þurfti í dag fimm endurræsingar á tíu mínútum áður en hann komst loksins alveg upp. Fékk undarlegar villur eins og að RAID-ið væri ekki til staðar, SIG: sigfault og önnur undarlegheit við ræsingu. Spurning um að fara að uppfæra alla súpuna, bæði MySQL, PHP, Apache og linux-kjarnann sjálfan.

Ef að það dugar ekki til þá er spurning um að færa sig yfir í annað stýrikerfi, FreeBSD eða… ahem… Windows.

Áhugavert:

Sem oftar þá er mest bara dundað á sunnudögum, fátt af viti gert.

Alltaf jafn áhugavert að sjá Bandaríkjamenn vera duglega að skrá sig á spjöld sögunnar sem níðinga, þessa athæfis þeirra sem nú er í gangi verður minnst sem eins svartasta bletts þeirra (og eru þeir þó nokkrir). Þetta er bara beint úr 1984.

Fórum á árshátíð Hugvits, sem að núna hét Árshátíð 002 (Bond þema) og var sumsé haldinn 02.02.02 og miðaverð var 2002. Mikið gaman hjá skemmtinefndinni.

Húllumhæið var haldið í félagsheimili Kópavogs, langt síðan að ég kom síðast þar inn um dyr. Flott atriði í byrjun, þegar að bak við rauða tjaldið birtust tvær stúlkur innan í ljóskeilum og fettu sig og brettu við Bond-tónlist. Alveg nauðalíkt byrjun í alvöru Bond-mynd.

Verst að ég fékk smá magakveisu… var það kínverski maturinn síðan í gær eða var það humarsúpan?

Áhugavert: