Jóhannes Birgir Jensson

Af hverju halda menn að markaðurinn sé Guð nú til dags? Salon er með ágætis umfjöllun um bók um Enron þar sem þeir minnast á þann kúltúr sem er í gangi meðal margra fjármálamanna. Það er aldrei til neitt sem heitir nóg eða ásættanlegt, það er alltaf stærra og betra, sama í hversu miklum gróða maður er. Andskotinn þó þú eigir tvö smáríki með húð og hár og hafir ekki hugmynd um öll húsin sem þú átt, þú skalt fá meira! Geðveiki. Það er í lagi að græða en græðgi er ekki góð.

Pæla peningamenn ekki í því að þetta heitir samfélag manna, sam-félag… nei.. þeir græða pening í einu samfélagi.. og flytja hann í annað þar sem þeir þurfa ekki að borga. Það er allur samhugurinn sem þeir búa yfir. Þetta heitir í dýraríkinu sníkjudýr.

Man enginn eftir manninum sem seldi eignir sínar í Borgartúninu fyrir ekki löngu síðan og varð skattakóngur með mig minnir 30 milljónir í skatt? Hann sagði sníkjudýrunum sem buðust til að koma þessum milljónum undan í erlenda sjóði að eiga sig, hann borgaði sína skatta og skyldur. Það er alvöru maður, Guðni Helgason rafvirkjameistari.

Áhugavert:

Mazdan mín virðist éta perur eins og brjálað pardusdýr á ávaxtamarkaði. Nýbúið að skipta um perur í framljósunum, aftur, og í dag tók ég eftir því að strax er farið annað framljósið. Er stóri rafgeymirinn minn að steikja perurnar?

Fundur vegna lokaverkefnis í HR haldinn í dag, við erum fjögur búin að skipa okkur í hóp og erum nú að ákveða verkefnið sjálft með vinnuveitanda okkar, Hugviti.

Kvöldið svo farið í að horfa á fyrirlestra vikunnar í skólanum, nú er um að gera að halda sér á réttum kili fyrir prófin.

Áhugavert:

Ég minni á að hægt er að breyta útliti vefsíðunnar með litlu kössunum hérna neðarlega til vinstri! Núna er ég með grænt þema í gangi hjá mér. Bleika þemað er í startholunum… það er bleikara en stelpulegasta stelpuherbergi.

Már kemur með mjög skemmtilegan punkt í dag, svei mér þá ef það eru ekki fleiri Skotar að koma en Falun Gong menn… Davíð hlýtur að vera búinn að gefa fyrirskipanir! Af íslenska landsliðinu er það helst að frétta að það mun líklega tapa komandi landsleik enda er Atli ennþá að læra hvernig á að stjórna liði, honum fannst íslenski sóknarleikurinn þvílíkt afbragð á móti Ungverjum þar sem við töpuðum 2-0. Hann er svipað hæfur í þetta og ég í stól Seðlabankastjóra, reyndar sem maður úr atvinnulífinu ætti ég að vera hæfari í þann stól en forpokaður fræðimaður, svo segir Davíð.

Ásta benti mér á sniðugt forrit, FreeLang sem er svona orðabókardæmi. Hægt að fá alveg heilan helling af tungumálum, bæta við í orðabókina og það besta er að hægt er að fá þetta á eigin tölvu algjörlega ókeypis. Einnig stórt safn leturgerða til að geta ritað mál sem ekki nota latnesku stafina.

Gunni benti mér svo á SpeakEasy, vef með ýmsum fróðlegum skrifum úr ýmsum áttum.

Stefán benti mér svo á skemmtilega stuttmynd sem ég smellti á vefsvæðið mitt svona til að eiga.

Áhugavert:

Fyndna frétt dagsins er sú stórfrétt að Bill Clinton millilenti ekki á Keflavíkurflugvelli! Hann ætlaði að stoppa í hálftíma og var búinn að redda því að Davíð Oddsson myndi bíða eftir honum á vellinum til að tala við hann í nokkrar mínútur og að minjagripaverslanir yrðu opnar. Það er glæsileg mynd af Íslandi sem að stjórnendur þess gefa, millilending er talin sem hátíðarheimsókn og æðsti ráðamaðurinn er meira en lítið tilbúinn til þess að skjótast á flugvöllinn og taka á móti stórmennum sem sjá ekki ástæðu til þess að einu sinni fara í alvöru heimsókn. Ætli Clinton hafi haft glerperlur með sér til að gefa innfæddum ráðamönnum?

Smá tölvumál, þessi síða bjargaði geðheilsunni, óþolandi þegar Microsoft eru að reyna að vera hjálplegir og troða drasli á mann sem að maður vill ekki!

PHPEdit er búið að taka talsverðum framförum, ég er að hugsa um að fara að nota það, maður er orðinn svo háður svona “code browsers” sem leyfa manni að sjá hvaða aðgerðir eru í klösunum sem maður er að skrifa. Maður.

Áhugavert:

Dagurinn í dag farið í ýmiss konar vefmál, til dæmis setti ég loksins á netið þennan litla kassa hér neðarlega til vinstri. 3 litlir kassar innan í einum stærri, með því að smella á þá breytist útlit vefsins. Það er skömm frá því að segja en þetta er búið að liggja á heimavélinni tilbúið til notkunar undanfarið ár og rúmlega það. Lesendur þessarar síðu geta því fengið annað útlit en þetta ef þeir óska þess. Ofurbleika útlitið er líka til en ekki er búið að bæta því við, sumum líst illa á það á meðan að mér finnst það fyndið. Kannski ég verði það mikill galgopi í mér á morgun að ég sleppi því lausu en það er frekar villt.

Kvöldið svo notað til þess að snæða kryddlegið svínakjöt og franskt rauðvín drukkið með, franskættar franskar kartöflur meðlætið með steikunum. Mjög kósí kvöldið hjá okkur.

Annars er ég að velta því fyrir mér að fara að setja amböguvefinn í loftið. Það er ekki hægt að lesa neitt á netinu lengur nema að rífa hár sitt vegna skelfilegra birtingarmynda ýmissa orða og máltækja hjá mörgum sem þar skrifa og þó telst ég seint til íslenskufasista.

Áberandi er röng notkun á “að” og “af”.

Það er nóg af gleði í kringum mig þó að ég poti inn urrandi punktum hérna um idjótaháttinn og aulaskapinn sem maður rekst á dags daglega.

Gleðifrétt dagsins er sú að í þessum mánuði hefur enginn Íslendingur verið handtekinn fyrir að vera á annari skoðun en ríkisstjórnin!

Áhugavert:

Það gleður mig að Beta hafi séð að sér og kippt ummælunum niður. Skynsamleg ákvörðun.

Ég held að fæstir þeir sem skrifa á netið fatti að ærumeiðandi efni er ekki minna ærumeiðandi þó það fari á vefsíðu en í dagblað. Nafnleysi er líka erfiðara að ná á netinu en margir halda. Það eru alltaf einhver staðar til gögn til að grafa nafnleysingjann upp. Internetið er ekki frumskógur þar sem maður étur eða er étinn, allir eiga að vera vinir eins og annars staðar. Það næst reyndar seint… prédikun lokið í bili.

Framhald: Ekki stóð sælan lengi yfir. Elísabet hefur fengið að vita það að enginn lögfræðingur nenni að standa í málaferlum vegna svona ærumeiðinga, vísir gestir hennar hafa gefið það í skyn. Hún hefur því tekið gleði sína á ný og dælir nú út óhróðri um fleira fólk. Hún ber fyrir sig málfrelsi, ég bendi á að frelsi fylgir ábyrgð. Hún má grafa sína gröf í friði fyrir mér.

Í dag var próf í hugbúnaðarfræði, það fór svona la-la held ég. Ein spurning úr formúlu sem ég man ekki eftir að hafa séð neins staðar á prenti í lesefninu… fannst prófið að mörgu leyti frekar vafasamt en það bauð upp á skáldmælgi og þar get ég plummað mig.

Áhugavert:

Í gær kom ég við í Europris á leiðinni heim úr vinnunni. Stutt að fara þar sem nýja verslunin í Skútuvoginum er bara beint á móti vinnustaðnum. Þar setti ég aðeins þrennt í litlu handkörfuna og fór svo og kom mér fyrir í þokkalega stuttri biðröð. Kona á undan mér með stóra hjólakörfu var þar á undan mér í röðinni. Hún fór að líta í kringum sig og sá mig með körfuna og var svo vingjarnleg að bjóða mér að fara fram fyrir sig í röðinni þar sem ég væri með svo lítið. Ég þakkaði afskaplega vel fyrir og færði mig. Það munaði hana engu upp á tímann en mig eitthvað enda hún með talsvert meira. Það er til hugulsamt fólk á þessu landi, það er bara of hugulsamt til þess að rassskella vitleysingana sem ná kjöri og spandera peningunum okkar í fáránlega hluti.

Í dag er ég alveg búinn að fá upp í kok af sumu fólki. Af og til lít ég á hvaða sullumbull Elísabet Ólafsdóttir hefur soðið saman, oft hægt að hlæja með að henni. Í gær og í dag er hún hinsvegar búin að vera versta Gróa á Leiti sem ég man eftir að hafa séð á skjá eða pappír. Hún birtir samtöl sem jafnast á við verstu gróusögur, ekki eina og ekki tvær heldur bara runur af þeim og bætir um betur í kommentakerfinu sínu. Tveir menn eru nafngreindir og talað um að þeir séu í eiturlyfjum, áreiti aðra karlmenn og fleira og fleira. Svo til að halda áfram fyrst hún er komin í þennan kjaftagír klykkir hún út með því að greina frá því að einhver maður hafi gengið í allar tölvur fyrirtækis hér í bæ til að kjósa sjálfan sig í einhverri kosningu.

Sjálfum er mér alveg sama hvort að þessir menn sem talað er um eru englar eða níðingar, villuráfandi sauðir eða sjálfsöruggir menn. Mér er nokk sama um hvað þeir gerðu eða eiga að hafa gert. Mér er hins vegar ekki sama um það að manneskja sé að breiða út óhróður um þá á almennum miðli þar sem þeir hafa hvergi verið spurðir sjálfir né geta hönd fyrir höfuð borið.

Það er til heiti yfir svona dæmi sem að Elísabet (Beta rokk eins og margir þekkja hana) stundar, þetta heitir meiðyrði og ber vott um skítlegt eðli þess sem að útvarpar því svona.

Stundum hlægilegir pistlar sem birtast á Deiglunni, í dag birtist einn slíkur þar sem Tony Blair er settur í guða tölu (enda hipp gæi svo ég noti orð höfundar) og mælt með því að hann hreinsi til í flokknum sínum. Hvernig sú hreinsun á að fara fram veit ég ekki, það er greinilega ekki til siðs að flokksmenn hafi mismunandi skoðanir. Það á kannski að hrekja menn úr flokknum eins og Ólafur F. Magnússon var hrakinn úr Sjálfstæðisflokknum eða á að hreinsa með svipuðum hætti og Stalín gerði? SUS-konunni Soffíu (sem ritar pistilinn) finnst það greinilega eina vitið að hreinsa út svona óaldarlýð sem að segir ekki guð og amen við öllu sem leiðtoginn segir. Blair er annars einna lægst skrifaði stjórnmálaleiðtoginn í Evrópu hjá mér, froðufyllt plastdúkka með niðurstöður skoðanakannanna í annari hendinni og sleikjó frá Bush í hinni.

Spurning hvernig lofræðan um Bush verður. Textavarpið var að greina frá því að Richard Perle, ráðgjafi í bandaríska varnarmálaráðuneytinu segi í samtali við þýska blaðið Handelsblatt að eina leiðin til að samskipti Bandaríkjanna og Þýskalands lagist er að Schröder segi af sér. Svona lagað fær mann til að vilja ganga inn í Hvíta Húsið og rassskella þessi litlu börn sem geta ekki unnt öðrum það að hafa öðruvísi skoðanir en þeir. Schröder er nýkjörinn leiðtogi lands síns, og að ætlast til þess að hann segi af sér (sömu orð og notuð eru um Saddam) til að Bandaríkin hætti að vera í fýlu er svo fáránlegt að ég get ekki sett það í orð.

Verst að ekki er hægt að fara fram í tímann og sjá hvar á skalanum Bandaríki nútímans eru á illveldaskala komandi sagnfræðinga. Hika ekki við að hóta hverjum sem er öllu illu fyrir engar sakir og víla lítið fyrir sér að steypa réttkjörnum stjórnum af stóli til að sinna eigin ímyndunarveiki.

Lotus Notes 6 kom út í dag, lítur nokkuð vel út. Allt á réttri leið.

Áhugavert:

Dæmið um óréttlæti heimsins kristallast í jafnvel smámunum eins og þeim að á meðan að 3 bestu útvarpsstöðvarnar eru lagðar niður skilst mér að FM957 lifi ennþá.

Fór í próf í dag og kom því heim í hádeginu úr vinnunni, sá þá einn ógnarstóran kött, bolabítslegur kubbur frekar en feitt flykki, fyrir framan húsið. Þegar ég kom svo heim úr prófinu var hann farinn en tveir aðrir komnir í staðinn, annan kannast ég við, hann er fastagestur á tröppunum hérna, en hinn hef ég ekki séð áður. Fólkið á 1. hæðinni gefur köttunum nefnilega iðulega að drekka þannig að þeir leita alltaf aftur hingað. Ég vona að maður þurfi ekki að fara að vaða í gegnum kattasjó til að komast heim til sín.

Prófið gekk sæmilega, hefði örugglega getað fengið mun betra ef ég hefði asnast til að lesa bókina fyrr, ótrúlegt hvað maður skilur þegar maður les svoleiðis…

Áhugavert: