Fékk í dag tilkynningu um að komin væri ný útgáfa af PC Suite frá þeim hjá Software602. Þetta er sumsé svona skrifstofuvöndull sem að gefur Office frá Microsoft ekkert eftir, mér finnst PC Suite reyndar mun skemmtilegri, og ekki sakar að það kemur frá fyrirtæki sem er annt um viðskiptavini sína. Ráðlegg Windows notendum að kíkja á þetta, þetta er nefnilega ókeypis og svo þarf ekki að ná í nema 13,6 MB uppsetningarskrá. Office er ekki uppsett á kjöltutölvunni minni, PC Suite er það!

Mér sýnist sem að Bandaríkjamenn séu nú að gera sitt allra besta til þess að láta sem að World Trade Center hafi aldrei verið til, samkvæmt þessari frétt þá eru allir upp til handa og fóta að breyta sjónvarpsþáttum, textum, myndum og gvuðmávitahvað. Önnur eins söguskoðun hefur ekki sést í lýðræðisríki svo ég muni eftir.

Áhugaverður tengill:

• Register fær á baukinn (en birtu ekki mitt bréf samt)

Í dag er 18. þessa mánaðar, sem að ég hefði svo sem ekki velt meira fyrir mér nema hvað að það er einmitt 18. hvers mánaðar sem að tölvuveiran Code Red fer á stjá. Ég var alveg búin að steingleyma kauða reyndar. Ég er umsjónarmaður með einum vefþjóni uppí vinnu sem að gegnir mjög sérstöku hlutverki, og ég fæ póst ef að upp kemur villa á honum, þar með talin 404 villa (ef að síða/skrá finnst ekki). Upp úr hádegi byrjaði að streyma inn póstur með villumeldingum, innihald beiðnanna (server request) voru ýmis tilbrigði við villu sem að er vel þekkt í IIS (vefþjónn sem að Microsoft gerir), þó að fyrir löngu sé hægt að fá uppfærslur sem að varna þessu. Við nánari skoðun kom í ljós að þetta er ný veira, sem að heitir á fræðimálinu w32.Nimda.A en almenningur getur kallað einfaldlega Nimda (sjá hvað Bjarni segir um hann), og er víst algjör óþokki sem að fær ýmislegt lánað frá Code Red, SirCam og þeim bræðrum öllum. Málið er bara það að það er gífurlegur fjöldi sem að pælir aldrei í því að uppfæra hugbúnaðinn sem að er notaður. Einkum ættu þeir sem að nota hugbúnað gerðan af Microsoft að vera duglegir að uppfæra hann, þar sem að þetta risafyrirtæki getur ekki gefið út hugbúnað án þess að hann sé með gapandi öryggisvillum (öll forrit innihalda villur, en Microsoft forrit innihalda STÓRAR villur).

Núna telst mér til að yfir 1700 villumeldingar hafi komið, líklega frá þá um það bil 240 vélum sem að eru sýktar. Á morgun sest ég niður, gref upp eigendur netanna sem að vélarnar eru tengdar við og sendi þeim póst, í þeirri von að þeir hafi samband við rétta aðila sem að lagfæra þá vélarnar.

Samkvæmt þessari frétt varð Morgunblaðið fyrir barðinu á tölvuveiru einmitt í dag. Stórar líkur á því að einhvers staðar hafi þeir haft vél án nýjustu uppfærslna keyrandi, og því fór sem fór.

Áhugaverður tengill:

• Klámstjörnur eða barnahetjur?

Þá er þriðji dagur sambandsleysis við internetið hér heima vel á veg kominn. Ég er búinn að gefa upp ýmsustu upplýsingar til þeirra sem svara í 800 7000 aftur og aftur, skrítið að þurfa alltaf að endurtaka sig, ég hélt endilega að þeir hefðu keypt svona Call Center hugbúnað, þar sem öll samskipti eiga að geymast miðlægt með sögu þeirra.

Og RSS elskar mig. RSS er annars XML staðall fyrir skrár sem að fjölmiðlar nota til að birta yfirlit frétta hjá sér. Ég er búinn að vera að gæla við það í einhvern tíma að skoða það nákvæmlega og búa til mína eigin vefgátt, þar sem ég raða saman því sem ég vil hafa. Um helgina gerði ég Íslenska Sheff Wed vefinn færan um að skila RSS frá sér, og það virkaði fínt. Í gær smíðaði ég svo fyrstu útgáfu vefgáttarinnar minnar, og hún er að virka fínt. Bjarni fær prik í flotta pípuhattinn fyrir RSS þjónustu sína.

Hverju ert þú að bíða eftir? Smíðaðu þér þína eigin vefgátt! Kóðanum geturðu stolið frá minni og breytt eftir hentugleika.