Jóhannes Birgir Jensson

Sáum í gær Hvernig skal missa strák á 10 dögum, lítil og sæt rómantísk mynd. Matthew McConaughey var meira að segja þolanlegur í henni.

Þetta var of mikið bíó til að vera satt, björgun Jessicu Lynch var sviðsett og staðreyndir máttu sín lítils (tengill frá Hrafnkeli).

Disney-samsteypan ætlar nú að gefa út DVD-diska sem ryðga. Fólk getur leigt þá, hefur 2 daga til að horfa á þá og eftir það hent þeim.

12 skýrslur og geisladiskur var það og í tvíriti að auki. Skiluðum þessu upp úr þrjú í dag, næst er það kynningin sem er á þriðjudaginn upp í skóla.

Glugga oft í New York Times sem er almennt talið besta blað Bandaríkjanna af þarlendum fréttamönnum. Til að lesa það á netinu þarf að skrá sig inn en það er ókeypis fyrir okkur sem erum utan Bandaríkjanna.

Tvær áhugaverðar greinar í því í dag, önnur fjallaði um kvenhetjur í tölvuleikjum og hvort þær styddu við eða ynnu gegn kvenréttindabaráttunni.

Seinni greinin er um eitt mesta áfall sem blaðið hefur orðið fyrir, fréttamaðurinn Jayson Blair samdi sínar fréttir upp úr öðrum blöðum og skáldaði heilan helling upp. 10 síðna grein um þetta.

Í kvöld var svo húsfundur sem var okkar annar og sá fyrsti fyrir nýju nágrannana. Allir voða sáttir og liðlegir.

Skýrslugerðin fyrir DMC er á lokastigi, þetta eru allt í allt að ég held 10 skýrslur sem við skilum (í tvíriti að auki).

Tengdó splæsti pizzu á okkur í kvöldmat, ekki amalegt það.

Sigurrós segir ekki frá ferðinni en segir hins vegar frá fundi sínum og eins átrúnaðargoða hennar, Brian May úr Queen.

Útgefandi EVE er ekki að standa sig nógu vel í dreifingu og kynningu, vonandi verða þeir með þrusubás á E3. Þessi grein minnist ekki einu sinni á EVE.

Mikið andskoti er það svo sniðugt hjá kjaradómi að hækka laun embættismanna um 19%. Stöðugleikinn hlýtur að hafa horfið eftir kosningar, eða hvað segir þú Davíð? Baggalútur segir satt og rétt frá. Stöðugleikinn dugði í 2 daga. Glæsilegt það.

Hryðjuverk var framið í Sádi-Arabíu sem er auðvitað versta mál. Eftirminnileg eru hins vegar ummæli George W. Bush:

U.S. President George W. Bush warned those responsible for the Riyadh bomb blasts, in which nearly 30 people died, will “learn the meaning of American justice.” (src)

Það vita auðvitað allir að amerískt réttlæti er á öðrum nótum en annað réttlæti.

RIAA sýna hversu gáfaðir þeir eru, sjá þessa frétt.

Sigurrós kom heim í kvöld, ætli það verði ekki ferðasaga á morgun hjá henni.

Ég gleymdi auðvitað að nefna það að skólafélagi úr MK er kominn á þing, Katrín Júlíusdóttir sem er myndarstúlka og mun örugglega standa sig þrusuvel. Sigurður Kári ætlar að gera það að sínu fyrsta verki sýnist mér að koma bjór og léttvíni í búðir. Ég er svo sem sammála því að það eigi alveg rétt á sér en sjálfur myndi ég hugsa meira um önnur mál ef ég væri þingmaður.

Ef að bjór og léttvín fara í búðirnar nú í ár þá hefur það ekki tekið nema 12 ár fyrir málið að komast í gegn, svo lengi hefur flokkurinn sem breytti merkingu orðsins frelsi verið við völd. Orwellian speak heitir það þegar að orð eru afbökuð og sett á hluti sem eru andstæða þeirra.

Fór um gatnamót Nóatúns og Laugavegar í dag og sá þar lögreglunema að æfa sig. Slökkt var á ljósunum og þau látin blikka appelsínugulu og svo stóð nemi ásamt leiðbeinanda á gatnamótunum og stjórnaði umferðinni. Fyndið reyndar að bara ein átt fór í einu, ekki báðar akreinarnar bæði upp og niður Laugaveginn eða Nóatúnið heldur bara önnur í einu.

Það lítur út fyrir að ríkisstjórnin haldi velli. Ég veit það ekki en mér hugnast það ekki að ríkisstjórn sem reynir sitt besta til að fjarlægjast þegna sína og múlbinda að auki sitji áfram. Það er bara ég en ég kann að meta frelsi mitt og óttast um það undir þessum ráðamönnum haldi þeir áfram á sömu braut. Það er bara örugglega ég… það er ekki eins og þeir handtaki fólk fyrir að vera asískt!

Fór í dag til að kjósa, nú á Kjarvalsstöðum í fyrsta sinn, örstuttur labbitúr. Ákvörðunin var tekin eftir talsverða umhugsun í kjörklefanum.

Stór hluti dagsins og allt kvöldið fóru í að reyna að troða Windows XP inn á nýja flotta turninn hans Kára. Gekk frekar illa, verð að láta Tölvulistann kíkja á þetta, virðist sem diskurinn sé eitthvað undarlegur.

Hann sýndi mikið snarræði flutningabílstjórinn sem dúndraði með 40 tonn af sandi fram af vegkanti til að bjarga lífum annara. Í fréttinni nefnir hann að mikil mildi hafi verið að enginn vegfarandi hafi verið að fara um göngin, það er reyndar ekki alveg rétt. Samstarfskona Sigurrósar átti 3 metra eftir út úr göngunum þegar bíllinn dúndraði niður fyrir framan hana… annars hefði hún lent undir bílnum og sandinum og varla þurft að spyrja að leikslokum þar. Enginn tékkaði hins vegar á því hvort að vegfarandi væri þarna á staðnum.

Fer ekki XD eða XB.

Á morgun eru kosningar, ótrúlegur fjöldi ætlar að halda vananum og kjósa flokk sem segir eitt en gerir annað, um er að ræða minn fyrrum flokk, bláu höndina sem einnig er þekkt sem Flokkurinn eða Sjálfstæðisflokkurinn.

Ungir sjálfstæðismenn auglýsa að þeir vilji frelsi til áfengiskaupa. Sjálfstæðisflokkurinn hefur verið í 16 ár í stjórn og ekki komið því í gang.

Það frelsi næst því tæplega með því að kjósa XD, gjörðirnar sýna okkur það.

Ég vil eiga heima í landi þar sem þeim sem minna mega sín er hjálpað, ekki að þeir séu kallaðir aumingjar, hæðst að þeim og þeim rétt lúsarölmusa svona upp á náð og miskunn. Allir eiga að hafa rétt á frábærri heilsugæslu fyrir lítinn pening.

Við mennirnir stofnuðum samfélag því að okkur hugnaðist ekki lögmál frumskógarins. XD þýðir að frumskógurinn vann.

Ég ætla að kjósa á morgun og XD og XB verða ekki á mínum kjörseðli:

• Lofa frelsi en færa okkur áþján
• Telja stríð ekki þess virði að spyrja Alþingi
• Skilja ekki að lögin eiga við um gjörðir þeirra líka
• Borga vanhæfum stjórnendum tugmilljónir fyrir að reka þá
• Borga fólkinu sem elur upp æskuna tittlingaskít
• Ráða fleiri vanhæfa stjórnendur – sökum flokkstengsla og ítaka
• Ógna málfrelsi og einstaklingsfrelsi Íslendinga og gesta hér á landi

Mér finnst þeir gjörsamlega siðblindir en þar sem það er víst kriterían fyrir því að ná langt í stjórnmálum þá segir það ekki mikið.

Af léttari málum er það að frétta að Sigurrós fór til London í dag með 3 vinkonum úr Kennó. Maður er svo vanur þessum utanlandsferðum eða helgarferðum innanlands að maður er ekkert að pæla í þessu lengur og er sjálfala þannig að allt er í góðu.

Kári fékk svo EVE sem snemmbúna afmælisgjöf frá okkur.

Dýraverndarsamtökin PETA (sem eru frekar öfgasinnuð í aðgerðum) hafa boðið bæjunum Hamburg og Fishkill styrki gegn því að þeir skipti um nafn. Fishkill þýðir víst fiskalækur á ensk-hollensku.. lesið meira um þetta undarlega mál á þessum síðum.

Einhver framtaksamur byrjaður að selja ISK (gjaldmiðillinn í EVE) á Ebay. Þetta er víst þekkt í svona netleikjum að fólk selji hluti og gjaldmiðla fyrir alvöru peninga.