Jóhannes Birgir Jensson

Gunnar vill að verkfall kennara verði stöðvað með lagasetningu náist ekki samningur milli þeirra og sveitarfélaganna. (src)

Þarna er Gunnar I. Birgisson, sveitarstjórnarmaður, að nýta sér þá staðreynd að hann, líkt og fáránlega margir aðrir ráðamenn, situr beggja megin borðs. Hann ætlar sumsé að nota Alþingis-Gunnar til að hjálpa Sveitastjórnar-Gunnari.

Er þetta ekki alveg ofboðslega siðlaust hvað stjórnmálamenn sitja margir allra megin borðs? Sveitastjórnir, ríkisstjórnir og Alþingi allt á sama tíma.

Ráðherrar ættu að segja af sér þingmennsku, þingmenn segja sig úr sveitarstjórnum og koll af kolli þannig að þessir aðilar sitji bara einum megin borðs en semji ekki við sjálfa sig. Björn Bjarnason er til dæmis ráðherra, þingmaður og borgarfulltrúi svo helstu embætti séu nefnd af mörgum. Þarna er þrískiptingin ekki að virka þar sem hann er bæði í löggjafarvaldi og framkvæmdavaldi (minnumst ekki á afskipti hans af dómsvaldinu). Þeir eru þó nokkrir aðrir sem svipað er ástatt um.

Þegar að menn eru of uppteknir að vera Alþingismenn til að geta verið bæjarfulltrúar (hvað þá forsetar bæjarstjórna) þá er málið að segja af sér, frekar að þeir geri eitt starf vel en mörg illa.

Tengill dagsins er UK scientists raise spectre of babies with three parents sem mér líst nokkuð vel á. Kirkjan söm við sig þarna.

Kerry verður að vinna, það er ekkert flóknara en það.

Fyrsti vetrarsnjórinn lét sjá sig í dag, varði ekki lengi en það var hrollur í manni. BBQ-kjúklingurinn náði að slá á hann.

Í dag skruppum við pabbi í Kringluna til að koma kallinum í alvöru samband, ADSL netsamband.

Þegar við gengum þar inn mættum við tveimur hnátum (líklega tvítugar) sem voru með kúrekahatta, pældum ekki mikið í því en þegar við gengum inn í húsnæði símans mættu okkur 3 aðrar stúlkur með kúrekahatta. Þegar aðalmaðurinn mætti á svæðið til að afgreiða okkur gat hann útskýrt að þetta væri vegna einhverrar kollekt auglýsingaherferðar. Hann var sjálfur án kúrekahatts sem og kollegi hans.

Þegar ég leit svo við í Smáralind mætti ég þar tveimur strákum með kúrekahatta og í Símaútibúinu þar voru strákarnir allir með kúrekahatta en stelpurnar ekki. Skondið.

Tenglar dagsins eru á varaliða sem vilja ekki vera sprengjufóður í Írak og ofsóttasta eiginmann Evrópu.

Anna Kristín bauð okkur í kvöldmat í kvöld í tilefni 25 ára afmælis hennar fyrr í vikunni. Maturinn var með ítölsku sniði en þar sem andúð mín á laukum er landskunn var dregið verulega úr hvítlauksnotkun. Ég hafði það þó af að fá mér eitt og annað sem hafði hvítlaukskeim og gekk það örlítið betur en áður.

Maturinn reyndist hinn besti kostur, pastað heimatilbúið og allt á evrópskan máta.

Allir viðstaddir reyndust mjög viðræðuhæfir og fórum við vítt og breitt þessa fjölmörgu klukkutíma sem við nutum veitinga við matborðið og svo seinna stofunni. Þó stóð kjötiðn og matseld upp úr, margt áhugavert sem maður fékk að vita um kjötiðn, slátrun, vöðva og rotnun!

Mér finnst alltaf jafn áhugavert að fá að heyra hvað annað fólk stundar og tæknilega þætti sem maður veit ekki af en eru daglegt brauð fyrir því.

Veit ekki en mér datt bara ein manneskja í hug þegar ég sá þessar myndir.

Eins og þessi frétt ber með sér sem og hið úrelta kosningakerfi, sem og að kjósendur þurfa að gefa upp “flokkshollustu” þegar þeir skrá sig á kjörskrá, þá er kosningakerfi Bandaríkjanna langt frá því að vera réttlátt og til sóma lýðræðisríki.

Fórum í kvöld á tónleika í Salnum, nokkur ár síðan ég kom þar síðast.

Tónleikarnir voru fínir og við hittum eitthvað af fólki þarna sem við könnuðumst við.

Játa það fúslega að ég er nokkuð ánægður með Kópavog, bærinn er orðinn mjög svo menningarvænn, íþróttavænn og að mér sýnist, fjölskylduvænn.

Tengill dagsins er á frétt um sextugu konuna sem bjargaði manni undan krókódíl með því að hoppa á hann.

Samkvæmt úrskurði Héraðsdóms Norðurlands vestra virtist ótilgreindur heimildarmaður hafa fullyrt við lögreglu á grundvelli fullyrðinga ótilgreinds heimildarmanns þess heimildarmanns að brot gegn fíkniefnalögum hafi átt sér stað að bænum þar sem mennirnir búa. Í úrskurðinum komi ekki fram að hinn beini heimildarmaður hafi verið yfirheyrður, og ekki heldur hinn sagði óbeini heimildarmaður.

Gróa á Leiti sagði Jóni á Leiti sem sagði lögreglunni sem talaði við dómarann sem heimilaði hleranir? Þvílíkir snillingar, voru ekki einu sinni yfirheyrðir, fleira ófyndið um íslenska lögregluríkið í sjálfri fréttinni.

John Eisenhower:Why I will vote for John Kerry for President.

Eftir spássitúr gærdagsins var löppin á mér alveg búinn. Fyrir rúmum 26 árum var vinstri löppin brotin í sundur og sett saman aftur, ákveðnar tæknilegar ástæður þar að baki. Þetta virkaði svo fínt næstu áratugi, eða þar til fyrir svona 5 árum að ég fór að fá verki í brotstaðinn. Ekki er búið að kveða upp endanlegan dóm um hvað þetta er en einna helst virðist vera um gikt að ræða.

Fæ verki í löppina við áreynslu og dró mig því úr fótboltanum nauðugur. Held að hjólið sé næst á dagskrá, það fer betur með þetta en labb, skokk og hlaup.

Helvíti hart samt að vera að kvarta undan gikt og ekki orðinn þrítugur.

Skruppum í dag í heimsókn á Selfoss þar sem við hittum fólk og annað, borðuðum kökur og ítalskar kjötbollur og fengum svo ferðasögu frá pabba þegar í bæinn var komið.

Í gærkvöldi trítluðum við hjónaleysin aðeins um Smárahverfið. Í dag fórum við svo í Vesturbæinn (… í Kópavogi að sjálfsögðu) og lögðum all nokkra kílómetra að baki.

Stefnum á að verða dugleg við þetta í vetur.