Jóhannes Birgir Jensson

Snillingarnir hjá mbl.is halda áfram að gera rósir í þýðingum, nú síðast varðandi rán í hraðbanka frá ATM-bankanum, þeim til fróðleiks ætti kannski að segja þeim að ATM er hraðbanki, ATM er sumsé það sem enskumælandi menn kalla hraðbanka (automatic teller machine = sjálfvirk gjaldkeravél). Eins og sjá má á þessum lista yfir banka í Írlandi þá er þar enginn sem heitir ATM.

Þetta voru reyndar bankar frá AIB-bankanum, eins og lesa má um í frétt The Irish Times.

Íslenskir fjölmiðlar halda áfram að pirra mig með þessu endalausa klippa, líma, þýða og mistúlka fréttir sem þeir fá frá Reuters og AP.

Þar sem verslanir voru lokaðar, og afgangar komnir í frost (svo maður fengi ekki ógeð á þeim strax) þá pöntuðum við Sigurrós okkur mat frá Indókína í kvöldmat, hann klikkar aldrei, vel útilátin og ekki nema rétt rúmlega 2.100 krónur heimsendur.

Þá opna ég hér með formlega þennan einkavef minn. Ég er búinn að vesenast í gríðarlegum fjölda vefja síðan 1995, og telst þetta vera minn þriðji svona einkavefur (það er, þriðji vefurinn sem að kemur eitthvað inn á mig sjálfan).

Þar sem mér er meinilla við tóma vefi þá get ég nú eilítið glaðst yfir því að ég er með eitthvað lesefni fyrir þá sem hafa ekkert betra við tímann að gera. Ég er nefnilega búinn að halda dagbók sem nær frá 14. ágúst (afmælisdeginum mínum) og fram til dagsins í dag. Hér til vinstri er þetta skemmtilega dagatal sem að ég bjó til, sem að ætti að auðvelda lesendum að fletta fram og aftur.

Ég ætla að biðja Egil um að pota mér á NagPortal, og ég ætla að gerast svo djarfur að nefna dagbókina mína “Riddari Bjargvættur”. Svo að menn haldi ekki að ég sé endanlega dáinn úr egótrippi þá er þetta einfaldlega merkingarþýðing á fornafni mínu og millinafni, Jóhannes þýðir “riddari guðs” (en sem guðleysingi sleppi ég guðs-partinum) og Birgir þýðir víst “bjargvættur”.

Gleðilegt nýtt ár, og velkomin.

P.S. Það er margt fleira sem býr í þessum vef en sést í byrjun, ég er með nokkra fítusa sem ég er að dunda mér við að fínstilla, þar á meðal val um útlit á vefnum sjálfum. Það mun hins vegar allt koma í ljós þegar ég nenni að setja það í gang (og þegar ég er sáttur við útkomuna).

Áhugavert lesefni:

Þeir eru ekki alveg komnir inn í rétta öld þarna í Bandaríkjunum, það er svo sem varla við því að búast því að það voru akkúrat svona menn sem voru flæmdir frá Evrópu og enduðu í Ameríku forðum daga. Ætli þessi prestur sé ekki kominn í beinan prestlegg af fyrstu púrítönunum.

Síðasti dagur ársins víst komin, held að það sé alveg sannað mál að tíminn líður miklu miklu hraðar eftir því sem maður eldist.

Búinn að dútla mér í því í dag að búa til húð (skin) á WinAmp tónlistarspilarann minn. Þemað sem varð fyrir valinu er að sjálfsögðu mitt ástsæla félag Sheffield Wednesday sem tapaði einmitt í gær 0-5 á heimavelli á móti Norwich City.

Byrjaði daginn á því að skipta um harða diskinn í fartölvunni minni (sjá færslu gærdagsins), fyrsta sinn sem ég opna fartölvu og þar sem allt er miklu minna, samþjappaðra og dýrara í fartölvum en borðvélum þá var ég pínulítið stressaður. Fann reyndar mjög góðar leiðbeiningar hjá HP. Þetta tókst að lokum og allt virðist virka.

Restin af deginum fór svo eins og venjulega þegar ég set upp vél, endalaus restört og download á driverum og pötchum og hvaðeina. Allt blessaðist að lokum, mér til hægðarauka svona næst þegar ég set hana upp (vonandi ekki… vona innilega að þetta vandamál hrjái mig ekki aftur) ætla ég að smella nokkrum tenglum hér inn:

Flott WinAmp skin:

Skrapp í dag að kaupa 30GB (reyndar 28GB þar sem að framleiðendur harðra diska telja bara 1000 MB í einu GB, í stað 1024 MB í einu GB, svona til þess að láta þá líta stærri út) disk í fartölvuna. 5GB diskurinn of lítill til að bæta þeim forritum við sem ég þyrfti vegna skólans eftir áramótin.

Í leiðinni aðstoðaði ég Sigrúnu í að kaupa sér fartölvu, fyrir valinu varð 1GHz MiNote7521-T frá Mitac, með DVD-drifi sem að ég varð svolítið skotinn í þegar ég var að snyrta til á vélinni hennar áður en hún tæki hana í notkun. Að auki kíkti ég til Daða bróður til að skoða gömlu tölvuna sem hann keypti á 5 þúsund kall, risakassi en skjákortið ekki upp á marga fiska. Það lítur út fyrir einn eina tölvuhelgina hjá mér.

Áhugavert lesefni:

Rólegur vinnudagur, kláraði eitt verkefni sem að var á borðinu og svo var lítið annað að gera en að dútla. Þessi tími ársins er langoftast sá allra dauðasti, verkefni koma ekki inn því að allir eru búnir með fjármuni ársins og ekki hægt að byrja á nýjum fyrr en eftir áramót þegar að nýtt fjárhagsár tekur við hjá öllum kúnnum.

Vinnudagur á morgun, spilaði bara CM fram eftir degi og við horfðum svo á Monsters Inc um kvöldið. Ágætis mynd sem er góð skemmtun, ráðlegg ekki þó að fara með ung börn á hana.

Lítið um jólaboð þetta árið, einu er frestað fram í janúar og verður þá fertugsafmæli, og annað dettur upp fyrir í ár.

Dagurinn í dag því alger letidagur, kláraði að lesa Football Confidential, sem ég fékk frá Sigurrós, og spilaði svo CM 01/02 fram eftir kveldi.

Football Confidential fjallar annars um skuggahliðar knattspyrnunnar, eins og unga leikmenn sem að umboðsmenn tæla til Vesturlanda, og fleygja svo á götuna ef þeir fá ekki samning, einkavæðingu vallarumhirðu sem fór illa í Bretlandi og kostaði marga áhugamenn ferilinn og miklar þjáningar, og margt fleira. Allt hefur sínar skuggahliðar sem að misbreyskir menn koma nálægt.

Fyrri hluta dags var ég að fikta í minni háttar uppfærslum á WFF.

Þetta árið vorum við heima hjá mömmu í mat, hamborgarahryggurinn var safaríkur og léttreyktur og betri en mig minnti. Allir voru voða rólegir, strákarnir léku sér í tölvum á meðan að við “eldra” fólkið tókum því bara rólega, og í fyrsta sinn sem ég man eftir mér var enginn að deyja úr spenningi að opna jólapakkana. Þegar við svo á endanum tókum til við það þá opnaði aðeins einn í einu sína gjöf, þannig að þetta tók góðan tíma og var mjög ánægjulegt.

Tvenn handklæði, 3 DVD (með Sigurrós), jólatré með ljósleiðurum sem skipta litum (með Sigurrós), 5 bækur, peysa og mynd (með Sigurrós) voru jólagjafirnar sem ég fékk þetta árið.

Þegar að við komum svo heim á Kambsveginn voru jólakortin opnuð í rólegheitum. Voðalega róleg og gleðileg jól hjá okkur.