Lokaverkefnið er á góðum skrið þökk sé gífurlegri vinnuhörku hópfélaga minna. Annað kvöldið í röð tek ég mér frí og hef það náðugt á meðan að þeir strita.

Kvöldið var kósýkvöld. Þetta er fyrsta hátíðin okkar sem við ákváðum að hafa á heimilinu, jólum og áramótum var varið í foreldrahúsum sem endranær. Núna vildum við prufa að vera út af fyrir okkur og það tókst bara prýðilega. Appelsínulamb og bakaðar kartöflur, ostaterta, páskaegg og smá snarl voru á matseðli kvöldsins á meðan að við horfðum á eina prýðisræmu og aðra verri.

Prýðisræman nefnist About a Boy og var vel þess virði að horfa á. Verri ræman heitir Die Another Day og er úr ofur-B-mynda flokknum góðkunna um James Bond. Við sáum ekki fram á að endast í rúma tvo tíma yfir greyinu þannig að við fórum snemma að spóla yfir á fyndnu atriðin og bar þar íshöllin á Jökulsárlóni einna hæst. Það er ekki tilviljun að það eru mörg ár síðan að ég gerði mér ferð í kvikmyndahús til að sjá Bond bregða á leik, þetta er skelfilega klént.

Tengill dagsins er á umfjöllun um mynd sem ég held svei mér þá að sæki talsvert í Annie og skyldar myndir.

Við erum nýflutt með okkar síma- og internettengingu til Íslandssíma. Eins og flestir vita hefur það batterí nú skipt um nafn og nefnist Og Vodafone.

Fáir hafa lýst yfir hrifningu með þetta nafn sem mér finnst sjálfum algjört skrípi. Tengsl Vodafone við Manchester United fara illa í suma en allra verst finnst mér þó að Vodafone sé styrktaraðili Ferrari í formúlunni. Sem McLaren-manni finnst mér það verulega vafasamt að vera viðskiptavinur Vodafone. Spurning hvort þetta reynist óheillaskref og Og Vodafone hendi út seinni hlutanum. Mættu alveg henda fyrri hlutanum út líka og velja sér eitthvað nafnorð.

Fékk í dag fyrstu einkunn af fjórum, náði strjálu stærðfræðinni en ekki var það glæsilegt.

Ekki klikka ég á tengli dagsins, í dag er hann á grein um Nigellu Lawson sjónvarpskokk og nefnist Food Porn.

Renndi í dag yfir tvö af betri vefritunum sem ég hef lesið. Smelli hér inn nokkrum áhugaverðum greinum sem ég fann.

Áhugafólk um margspilunarleiki á netinu gæti haft áhuga á að lesa grein sem nefnist Who killed Miss Norway?

Í Bandaríkjunum fjölgar trúfélögum og þar er farið að verða vart við talsverð vandræði á vinnustöðum sökum þröngsýni bæði vinnuveitenda og samstarfsmanna en einnig krafna starfsmanna.

Óöldin í Írak og áhrif hennar á sagnfræðileg verðmæti eru eðlilega mál málanna þessa dagana. Reynt að varpa ljósi á sögulegt gildi þessara muna í þessari grein sem og þessari. Hjálparsamtök fá ekki að fljúga með hjálpargögn til Norður-Íraks, Bandaríkjamenn segjast ekki vera búnir að tryggja allt en aðrir aðilar segja að allt sé til reiðu.

Al Bawaba veltir því fyrir sér hvernig Íraksinnrásin muni koma fram í sögubókum framtíðarinnar.

Út er komin í Bandaríkjunum bók um lík sem greinir frá því hvað verður um þau, sum lenda í lýtaaðgerðarannsóknum, önnur í bílslysarannsóknum og einstaka lenda jafnvel í safnhaug sem er eingöngu samansettur úr líkum manna og þar fá ýmis kvikindi að leggja sitt af mörkum.

Bílaáhugamenn sem eiga formúgur og meira til geta fengið sér eðaldrossíur sem flestar eru skotheldar að auki.

Bjöllukúrfan sem flestir hafa lært í menntaskóla er víst að verða úrelt í nútímaþjóðfélagi, ýmist kaupir fólk ódýrustu vörurnar eða þær dýrustu, lítið þarna á milli. Þetta á víst við um fjölmargt og má lesa um í þessari grein.

Að lokum ein klaufafrétt, snillingur hjá CNN setti óvart minningargreinar um Jóhannes Pál páfa, Ronald Reagan, Dick Cheney og fleiri í loftið. Þeir eru allir lifandi ennþá þó.

Ég get svarið það. Það koma dagar þegar ég er handviss um að ég er með eitthvað gígantískt segulsvið í kringum mig sem steikir öll rafmagnstæki á heimilinu.

Fartalvan mín hefur verið smám saman að missa sambandið að aftan við flest öll jaðartæki og það er frekar bagalegt, sérstaklega þegar rafmagnið fer að klikka líka.

Sambyggði DVD/myndbandsspilarinn okkar er nýfallinn úr ábyrgð og hefur því tekið upp á því að bila, hver einasti geisladiskur sem settur er í hann snýst bara til eilífðarnóns.

Það lítur út fyrir viðgerðir í næstu viku.

Fórum í dag í fermingarveislu hjá frænku minni, Írisi Elvu. Fyrsta sinn sem Sigurrós fer í indjánatjaldið í Mjóddinni og í annað sinn hjá mér. Prýðisgaman, það eru mööörg ár síðan að ég lét sjá mig á fjölmennum samkomum og mörgum gekk illa að þekkja mig aftur, mér gekk einnig misvel að þekkja aftur fólkið í yngra kantinum sem var í neðri hluta grunnskóla síðast þegar ég sá það en núna orðið fjallmyndarlegt og jafnvel ráðsett. Það verður meira um mig á svona samkomum í framtíðinni.

Rökstuddur grunur leikur reyndar á því að ég hafi verið elsti einstaklingurinn á svæðinu sem ekki á afkvæmi, þessi fjölskylda er afar virk við fjölgun mannkyns.

Ekki var það verra að happadrætti var sett í gang og hlaut ég fría klippingu og Sigurrós fékk páskaegg númer 1.

Tengill dagsins er viðtal við Macy Gray.

Fékk í dag bréf frá heilsugæslunni í Grafarvogi þar sem bent er á að ég hafi ekki lengur lögheimili þar og vegna lítils fjölda lækna og mikils fjölda íbúa sé verið að sparka út öllum sem ekki hafi lögheimili þar.

Þetta er í annað sinn sem mér er sparkað af heimilislækni, síðast var það þegar við fluttumst úr Kópavogi í Grafarvoginn, þá var það heilsugæslan í Kópavogi sem mátti ekki meira með mig hafa.

Hittum nýju nágrannana okkar í dag, virðist mesta prýðisfólk.

Í miklum verslunarleiðangri í kvöld hittum við Örn og Regínu og fengum þar merkilegar fréttir af fólksfjölgun.

Tengill dagsins fjallar um tengsl eineltis og vopnanotkunar sem þykja víst nokkur.

Fyrir utan verkefnavinnu hefur fátt gerst í dag.

Hermaðurinn sem átti að hafa lifað af þegar Írakar skutu 7 skotum eða svo í nýtískuhjálminn hans hefur viðurkennt að þetta hafi verið grín hjá honum og félögum hans.

Strætóbílstjórar Bagdad hafa keyrt þó að stríð hafi verið í gangi, núna eru þeir í vandræðum þar sem óaldarflokkarnir hafa verið að ræna strætisvögnunum þeirra.

Áhugavert:
• How and why the US encouraged looting in Iraq
• US guards only oil and intelligence as looters ransack government buildings

Matti er með vökult auga með dagbókinni minni og svarar tveim síðustu færslum mínum hjá sér, og auðvitað stenst ég ekki mátið og svara fyrir mig, hann svarar og ég svara aftur. Svo er Ragnar þarna líka að tjá sig. Við Matti erum víst orðnir duglegir að ræða málin á hinum ýmsu athugasemdakerfum, það kemur kannski að því að ég spyrji hann hvernig honum tókst að slípa af sér kílóin, ég hef reyndar ekki farið yfir 91 kíló en það er þó 15 kílóum of mikið miðað við þá gömlu góðu daga þegar ég var upp á mitt besta.

Stríð er annars ekki tölfræði, 1.300 eða 30.000 látnir eru bara tölur. Ég er bara svo mikill einstaklingshyggjumaður að mér finnst hvert líf verðmætara en svo að því megi fórna sem peði í refskák pappírspésa.

Annars er allt enn brjálað á götum úti í Írak þó að ástandið fari örlítið skánandi hér og þar, það er víst orðið svo lítið eftir til að ræna hvort sem er.

Looting decreases in Iraq cities, but there is not much left to take
Thieves of Baghdad Iraq’s suffering continues unabated
Red Cross workers desperate
Protests as looting in capital goes unchecked

Í dag komst hins vegar internettengingin við Íslandssíma í gagnið, það hefði þó verið skemmtilegra ef maður hefði verið látinn vita af því að búið væri að ýta á takkann í símstöðinni.

Ég mun ekki sakna símtalanna við svörtu hítina sem nefnist 800 7000 í daglegu tali.

Þetta er annars búinn að vera voðalega mikill mánudagur í dag, langt síðan að ég upplifði svona pirrandi dag. Sveiattans Java að gera manni lífið leitt, fartalvan orðin sambandslítil við náttúrulega lyklaborðið mitt og rafmagnsleiðslan farin að detta út við minnsta hnjask.

Ég komst þó loksins á sumardekkin og spæni því ekki malbikið upp fyrr en í lok haustsins.

Í gærkveldi náði ég svo loksins að gefa mér tíma til að lesa bókina Acts of the Apostles. Þetta er bók sem sækir sitthvað til 1984 og Brave New World en byggir á genabreytingum og nanóvélmennum, varpar upp nokkrum skuggalegum möguleikum sem verða brátt á færi okkar að nota. Fínasta lesning.

Björn Bjarnason sendi mér svarpóst í dag en í gær sendi ég honum tengil á færslu mína þar sem hann kom talsvert við sögu. Hann þakkaði mér fyrir sendinguna en kvaðst ekki dreyma um að verða hermaður eða hershöfðingi.

Hann skrifaði reyndar ekkert um þá fleti sem ég velti upp varðandi kolólöglegar og siðlausar aðgerðir stríðsaðila, ætli maður verði ekki að ganga á menn með ítarlegan spurningalista og krefjast svara í eigin persónu.

Annars skilst mér að Björn hafi verið að miklu leyti alinn upp á hæðinni fyrir neðan núverandi aðsetur Betrabóls. Lítið land.

Í gær bakaði Sigurrós pizzur og við buðum pabba, Daða og Kára í kvöldmat. Kári var næturgestur hjá okkur í tvær nætur og þar áður í einar sjö eða átta hjá pabba þar sem mamma og Teddi fóru í golfferð til útlanda. Aðspurð var víst eina vandamálið hversu mikil sól var, þau eru víst bæði léttsteikt núna.

Í morgun leit pabbi svo við með Mannsa sér við hlið. Mannsi var mættur til þess að hefla dyrakarminn á svaladyrunum svo við gætum komist út á þær án mikilla vandræða. Vatnsveðrið í vetur hefur haft þau áhrif að allir karmar hafa tútnað gríðarlega út og þurfti umtalsverð átök til að opna, hvað þá loka.

Í dag sem undanfarna daga hef ég svo verið að vinna í DMC-kerfinu ásamt félögum mínum, þetta er stóra lokaverkefnið á leið okkar að B.Sc.-gráðunni.

Í morgun gerði ég undantekningu á reglu sem ég hef yfirleitt í heiðri. Ég hef það sumsé fyrir reglu að lesa aldrei þruglið sem kemur frá Birni Bjarnasyni í miðopnu Morgunblaðsins, það grætir mig yfirleitt að sjá skoðanir þessa manns sem er ekki eingöngu fyrrverandi ráðherra heldur einnig núverandi alþingismaður og borgarfulltrúi (of margir sem sitja þannig beggja megin borðs).

Í dag var það innrásin í Írak sem Björn var að rifna af stolti yfir. Hann fordæmir svo sófahershöfðingjana sem hafa látið í ljós efasemdir um útfærslu hinnar guðlegu dýrðlegu innrásar sem var gerð til þess að…

• finna og eyða gereyðingarvopnum Íraka… þau hafa ekki fundist
• gera út af við al-Qaeda sem Írakar styðja… en er bara algjör lygi eins og leyniþjónustumenn Bandaríkjanna, Bretlands og Ísraels hafa sagt
• frelsa írösku þjóðina… frá Saddam og setja hana í hendur óaldarflokka sem tæma sjúkrahús og aðrar stofnanir af öllu sem þar er að finna á meðan að hermenn horfa á
• frelsa írösku þjóðina… með því að skjóta litlar stelpur og litla stráka, konur og menn, fréttamenn og fleiri sem eru á vitlausum stað á vitlausum tíma eða líta ekki nógu friðsamlega út að mati bandarískra hermanna á táningsaldri
• koma Saddam frá völdum… sem er langbest að gera með því að skjóta eldflaugum á veitingahús þar sem grunur lék á að hann væri, þeir sem voru í raun og veru á veitingahúsinu að snæða voru bara afskaplega óheppnir, þetta heitir annars aftaka án dóms og laga og er kolólöglegt eins og flest annað í stríðinu

Bíddu.. hver var aftur ástæðan? Ég er alveg búinn að gleyma hvaða afsökun þeir notuðu síðast. Birni er nákvæmlega sama enda klæjar hann illilega í að komast í slátrunina sjálfur.

Björn Bjarnason er nefnilega maðurinn sem að vill ólmur að Íslendingar eignist sinn eigin her og ætli hann, Sófahershöfðingi Íslands, verði ekki fyrsti hershöfðingi þess hers?

Þetta stríð er rangt ekki eingöngu vegna láts óbreyttra borgara heldur líka vegna þess að hegðun Bandaríkjanna jafnast nú fyllilega á við Sovétríkin gömlu. Ég bendi á litla frétt í Morgunblaðinu þar sem segir:

“lista 55 Íraka sem Bandaríkjaher gaf út í gær og fyrirskipaði að Írakarnir á listanum skyldu annað hvort handsamaðir eða drepnir”

Það er ekkert flóknara en það, gefinn út aftökulisti. Engir stríðsdómstólar, engin réttarhöld, engar sannanir. Bara hreinn og klár aftökulisti. Stríðsglæpum Bandaríkjanna fer ógvænlega fjölgandi. Fangarnir á Guantanamo sitja enn í einangrun og án lögfræðiþjónustu.

Velkomin í heim nýmálsins (newspeak, sjá bókina 1984) þar sem valdhafar skipta út orðum fyrir bull sem kemur þeim betur, þar sem hermenn eru ólöglegir bardagamenn og því ekki undir neina sáttmála seldir, þar sem herinn heldur ekki uppi lög og reglu á stöðum þar sem hann sprengir yfirvöld í tætlur, þar sem aftökulistar eru gefnir út, þar sem eldflaugum er skotið á mannmarga staði til að drepa aðila án dóms og laga. Frá Dýrabæ (Animal Farm) kemur svo Ísland, gaggandi hæna í liði með svínunum sem eru að slátra öllum sem ekki eru svín.

Þetta er verra en á hinum myrku miðöldum, þetta er að verða hreinasta helvíti.

Rétt um mánuður í kosningar og þeir sem verða ekki á landinu þegar þær fara fram ættu að fara að drífa sig að kjósa í utankjörfundaratkvæðagreiðslu (er ekki til þjálla orð?). Kosningaloforð og stefna flokkanna er mismunandi og oft óljós. Nú er loksins hægt að finna könnun þar sem þú getur séð hvernig skoðanir þínar samræmast helstu stefnumálum flokkanna.

Ég birti hér niðurstöðuna mína, tók skjáskot og færði hausinn til svo þetta kæmi skemmtilegar út.

Tékkaðu á þinni skoðun á Afstaða.net, þetta er auðvitað óvísindalegt en bendir þér kannski á hvaða kosti þú ættir að kynna þér betur.