Byssufélagið (NRA) í Ameríku er farið að setja fólk á svartan lista, allir sem þykja hafa skoðanir sem ekki eru eftir þeirra geðþótta detta á hann. Andstæðingar NRA hafa sett upp síðu þar sem vakin er athygli á þessum lista.

Forritaði í dag aðeins í rök-forrit-unar-málinu Prolog og fannst það æði. Margar fyrirspurnir sem SQL ræður illa við sem hægt er að útfæra í þessu. Verandi veikur fyrir gagnagrunnum var þetta auðvitað sá flötur sem ég sá á þessu fyrrum óskabarni allra forritara.

Skaust til tannsa til að láta taka myndir af mér, endajöxlunum reyndar. Grunur minn var staðfestur, annar neðri endajaxlinn sver sig í ætt við þá efri sem komu út með miklum harmkvælum og brutu meðal annars hluta kjálkabeinsins. Sá fyrri reyndist þung raun fyrir tannlækninn og kom út í þremur hlutum. Sá seinni var ævintýralegri, brotnaði úr honum í þá mund sem við ætluðum að fara til Selfoss til jólahalds og ég fór á neyðarvakt tannlækna að kveldi Þorláksmessu. Sjá má myndir af þessum hnullungi hér og hér. Á síðari myndinni má sjá tannræturnar þrjár gægjast upp úr kjálkabeinsflísinni sem er orðin dökk og blóðsprungin.

Röntgenmyndir dagsins í dag leiddu sumsé í ljós að vinstri endajaxlinn niðri er með tvöföldum vinkli en sá hægri er með þeim saklausari þó vel boginn sé. Mér hefur því verið vísað til sérfræðinga til að leggja á ráðin þar með næstu skref. Ég bíð spenntur eftir því að taka mynd af enn einum harðjaxlinum og smella hér á netið til að hrella þá sem eru með ósköp óspennandi og venjulegar tennur. Ég er víst með tanngarð úr ættinni hans Dalla afa þar sem jaxlar eru sko alvöru harðjaxlar.

Já, hvaða nám ætti maður að skella sér í þegar maður loks klárar B.Sc í tölvunarfræði? Ég get fullyrt að M.Sc í tölvunarfræði er ekki sterkur kandídat þar!

Það er alltaf smá huggun að því að þó að það séu kolklikkaðir menn við stjórnvölinn hér á landi þá eru þeir enn geggjaðri í Ameríkunni. Samtök sem stunda alvöru kynfræðslu þar og tala um smokka (!), kynlíf fyrir hjónaband (!) og viðlíka svakalegheit (að mati Bush og félaga) fá sko að finna fyrir því. Þau eru tekin fyrir sí og æ í endurskoðanir og það virðist vera eingöngu vegna þess að þau gútera ekki fáránlegar aðferði r(og gjörsamlega ósannað að þær beri árangur) Bush og félaga (sem þeir fengu í arf frá t.d. Reagan) um að táningar eigi að vera skírlífir þar til í hjónaband er komið.

Talandi um Reagan þá á að fara að sýna sjónvarpsseríu um kallinn, vinir hans Bjössa hjá WND eru æfir og eru klárir á því að almenningi bjóði svo við því að farið sé svona með “hetjuna” að CBS-sjónvarpsstöðin leggi upp laupana. Mér finnst þá álíka trúlegt og að Ísland verði fyrir eiturgasárás hryðjuverkamanna, reyndar höfum við orðið fyrir mikilli mengun af hálfu ameríska hersins en það virðist vera auðvelt að fyrirgefa og gleyma, ha Bjössi?

Mel Gibson er greinilega ekki trúaðri en svo að hann hunsar það þó að eldingum ljósti niður í þann sem leikur Jesú við tökur á myndinni.

Það virðist stórvarasamt að fara í fjallgöngubrúðkaupsferðir samkvæmt frétt Pravda. 50 manns hafa látist við göngur, fjallgöngur og flúðasiglingar á þessu ári í Rússlandi.

Ekki vissi ég að Maine hefði lýst yfir stríði gegn Kanada!

Hmmm… ætli þessi stafatákn hér að ofan nái að sýna hversu kipruð augu mín eru af þreytu? Erfið nótt, við virðumst hafa smitast af Snúra litla í gær og skiptumst á að vakna í nótt, hvorugt grét þó og ekki þurfti að skipta á okkur eða gefa að borða.

Aðdáendur CSI ættu ekki að láta þessa frétt um CSI:Crime Scene Insects framhjá sér fara.

Í kvöld heimsóttum við Örn, Regínu og Snúra litla. Snúri er sumsé gælunafnið sem er notað þangað til að drengurinn verður skírður í desember.

Við ákváðum að vera ofsa góð við þau og komum með matinn með okkur og elduðum fyrir þau og Sigurrós vaskaði meira að segja upp. Vonandi að það hafi hjálpað þeim enda búnir að vera strangir og erfiðir dagar og nætur svo ekki sé talað um endalausan gestastraum sem hefur verið. Við ákváðum að við gætum beðið nokkra daga og vildum bara hitta þau í rólegheitum og fórum því ekki fyrr.

Örn er nú búinn að læra að nota myndaalbúmið og dældi inn í kvöld fyrstu myndunum af krílinu (einnig hægt að skoða sem “slideshow“).

Ekki skil ég fólk sem getur leiðst. Það er alltaf nóg að gera!

Því miður hefur dagurinn verið kúfullur frá A-Ö og því neyddist ég til að sleppa útskriftarveislu, það leiddist mér. Maður er stundum of týpískur Íslendingur, með of mörg járn í eldinum.

Erindum dagsins er gerð skilmerkileg grein fyrir hjá (ung)frúnni.

Amazon í Bretlandi slógu eigið met, ég pantaði á mánudaginn og fékk þetta í dag! Frábært!

Ég hef sagt það áður og ég segi það enn og aftur að Efnabræður eru argandi gargandi snillingar.

Ég tárfelldi næstum því þegar ég sá öll myndböndin á DVD-disknum í fyrsta skipti og Star Guitar myndbandið og svo útskýringin á því var alveg gapandi snilld. Ég á eftir að hlusta á aukadiskinn sem fylgdi með, ætli maður tárfelli ekki bara á morgun þegar maður heyrir enn meira.

Áhugavert:
• John Mellencamp: Recall Bush

Í morgun biðu mín tvö SMS-skilaboð þar sem tilkynnt var að Örn og Regína hefðu eignast strák rúmlega hálftvö í nótt. Þá eru þeir Þórssynir allir orðnir margra barna feður, sem er öllum börnum meira en þegar ég kynntist þeim fyrir rúmum ellefu árum.

Horfðum í kvöld á A View from the Top þar sem Gwyneth Paltrow, tvífari Regínu, stóð sig vel í lítilli, óraunverulegri og sætri mynd.

Amazon eru að stússast í merkilegum hlutum þessa dagana, þeir eru að skanna inn textann úr öllum bókum sem þeir hafa þannig að hægt er að leita að nafni persónu og fá til dæmis allar bækur þar sem minnst er á hana. Wired birtir frétt um þetta sem nefnist The Great Library of Amazonia sem er tilvísun í bókasafnið í Alexandríu til forna.

Skondni pistill dagsins kemur svo frá Englandi og er um Phil Neville sem er meðal annars settur í flokk með Quasimodo og hestinum Foinavon og öðrum ólíklegum sigurvegurum.

Hmmm… Sheffield Wednesday og Lazio töpuðu bæði í kvöld. Lyon náði þó jafntefli í gær.

Urrandi yfir verkefni sem við vorum að ströggla við að klára, skandall að mestur tíminn hafi farið í að kynna sér forrit sem enginn kennari kann á til að fá út gögnin sem áttu að vera aðalatriðið en urðu ekki vegna tímaskorts.

Heyrðum líka í stórvarasömum laganemum upp í skóla.

Tengill dagsins er svo á fyrsta manninn sem lifir ferð niður Niagarafossana (án hjálpartækja) af.