Theoi Project

Kíkti aftur í EVE um jólin og hef ílengst þar aðeins aftur. Tók þátt í kvöld í klukkutímalangri orrustu, hægt að sjá myndband sem sýnir hluta af henni. Er samt byrjaður að draga mig aftur út núna þegar skólinn er kominn á fullt aftur.

Páfagaukurinn hans Churchill er enn á lífi og blótar of mikið til að vera húsum hæfur, orðin 104 ára greyið.

Svefnlítil nótt, Sigurrós frekar kvefuð og vaknaði nokkrum sinnum hóstandi. Vorum svo komin út úr húsi fyrir klukkan 7 í morgun. Leigubílar og snjóruðningstæki áberandi í umferðinni þá.

Jamm, það slær fátt út ítölsku kjötbollurnar sem konan eldar.

Ég tók að mér hlutverk ruðningstækis í dag og byrjaði á því að ryðja leiðina niður tröppurnar hjá okkur. Tók svo mest af stóra bílastæðinu hjá okkur og gaut illu auga að nágrönnunum hinum megin við götuna sem eru ekki með svona innkeyrslur eins og við hérna megin. Þeim nægði að sópa snjóinn af tröppunum hjá sér.

Endaði á því að gera allan göngustíginn ferðafæran. Mig grunar að harðsperrur í mjóbaki verði talsverðar næstu daga.

Kvöldinu var eytt í afslappelsi fyrir framan Scorpion King og Anger Management.

Sepp Blatter karlinn, forseti FIFA, er alveg ótrúlega vanhæfur. Nýjasta ruglið hjá honum er að leggja það til að kvenmenn leiki í kynþokkafullri búningum.

Skopmynd dagsins: Foxtrot: Spam spam spam Monty Python

Æ æ æ, sko það er eitt að fyrirtæki skapi sér ímynd með auglýsingum og aðgerðum. Svo er það allt annað að kolfalla fyrir einhverjum guttum sem þurfa bara að segja lykilorðið “branding” eða “mörkun” og þá slefa allir stjórnendur. Ég hélt að ofurtrúin á branding hefði dottið niður en svo virðist ekki vera, eins og Síminn (ekki lengur Landsíminn?) segir:

Síminn skoðar ekki viðskiptavini sína út frá hefðbundinni markhópaskiptingu í fyrirtæki og einstaklinga enda eru þeir ekki einsleitir. Síminn skiptir fólki eftir því hvernig hughrifum það verður fyrir og hvað drífur það áfram, eftir lífsstíl og gildismati. Vöru- og þjónustuþróun miðast við þarfir þessara hópa. Síminn er líklega fyrsta fjarskiptafyrirtækið í heiminum sem notar þessa flokkun. (src)

Ég stórefast um að Síminn sé fyrsta fjarskiptafyrirtækið sem notar einhverjar svona tískudillur til að flokka viðskiptavini sína. Þetta hefur líklega hljómað svaka flott samt á fundi með ráðgjöfum…

Þar sem Hringadróttinssaga er flestum í fersku minni þá er ekki úr vegi að líkja ráðamönnum vorum við Nazgúlana, kuflaklæddu dæmdu sálirnar sem flugu reðureðlum og sugu lífið úr öðrum.

Til að eiga fyrir sendiráði í Japan þá er geðdeildum lokað, til að geta lækkað skatta sterkefnaðra er skorið á læknisþjónustu.

Í stað þess að taka til í heilbrigðiskerfinu og gera það skilvirkara og eyða biðlistum sem kosta ofboðslega miklu meiri pening en þeir spara, þá leyfa þeir lélegum vinnubrögðum stjórnenda að grassera og skera svo á peninga sem veitt er þangað.

Einkaframtakið er ekki með betra starfsfólk en ríkisstofnanir, það eru bara færri stöður lausar í fyrirtækjum fyrir handónýta flokksgæðinga, kannski eins og 2-3 per stórfyrirtæki. Á meðan geta handónýtir flokksgæðingar verið 20-30 í stórum ríkisstofnunum, þeir eru auðvitað ónæmir fyrir niðurskurði.

Ríkisstofnanir eru ekki vandamálið, pólitíkusar eru það.

Fór með bílinn í skoðun í gær og fékk réttan miða. Fékk endurskoðun á hann fyrir þó nokkru vegna þess að það voru 2 perur sprungnar í númersljósinu og sambandsleysi í aftanívagnstenginu… sem við höfum aldrei notað.

Þetta hefur allt verið samviskusamlega fært inn í bókhaldið okkar sem við erum að færa inn í á nýju ári til að fá yfirsýn yfir eyðslumynstur okkar.

Að hluta til má þakka (eða kenna um) þeim Bjarna og Unni fyrir þessa bókhaldsröggsemi hjá okkur, þau eru víst með eitthvað svipað í gangi hjá sér held ég.

Æ ég gleymdi alveg hvað ég ætlaði að skrifa.